Gamlinginn á leið í Selfossbíó

Kvikmyndin „Gamlinginn sem skreið út um gluggann og hvarf“ er byggð á samnefndri skáldsögu eftir sænska rithöfundinn Jonas Jonasson, en hún kom út árið 2009.

Segja má að bókin hafi orðið stórsmellur nokkuð óvænt, enda fyrsta bók höfundar, en hún hefur nú verið þýdd á yfir þrjátíu tungumál og hvarvetna notið mikilla vinsælda. Myndin varð þegar á frumsýningardegi metaðsóknarmynd í heimalandinu og fer nú sigurför um önnur Norðurlönd enda einstaklega skemmtileg saga og áhugaverð.

Það er Robert Gustafsson sem fer hér með hlutverk hins 100 ára Allans Karlsson sem flýr frá elliheimilinu á 100 ára afmælisdegi sínum. Ekki líður á löngu uns hann er kominn í hreint ævintýralegar og oft sprenghlægilegar aðstæður en um leið er ævisaga hans og fortíð rifjuð upp.

Í ljós kemur að Allan á enga venjulega ævi að baki heldur hefur hann hitt og haft áhrif á marga helstu lykilmenn síðari tíma, svo sem Franco, Harry S. Truman Bandaríkjaforseta, Stalín, Maó Tse Tung, Albert Einstein, leiðtoga Norður-Kóreu, Kim II Sung, Winston Churchill og fleiri.

Hins vegar eru áhöld um hvort áhrif Allans á það valdamikla fólk sem hann hefur hitt á lífsleiðinni hafi orðið veröldinni til góðs. Um það verður hver og einn að dæma fyrir sig en víst er að án hans væri veröldin ekki sú sama og hún er í dag.

Myndin er frumsýnd í Selfossbíó klukkan 20:00 föstudaginn 21. febrúar og svo má nálgast aðra sýningatíma á www.selfossbio.is eða á Facebook síðu Selfossbíó.