Eyjalögin óma á Suðurlandi

Söng og skemmtisveitin Obbó-síí frá Vestmannaeyjum er loksins á ferðinni á fastalandinu og heldur Eyjakvöld á tveimur stöðum á Suðurlandi um helgina.

Eyjalögin verða sungin í Hvítahúsinu Selfossi í kvöld, föstudagskvöld og í Heimalandi undir Eyjafjöllum á laugardagskvöld. Skemmtunin hefst kl. 21 í báðum tilvikum. Gestur á seinna kvöldinu er Árni Johnsen alþingismaður.

Obbó-síi er sjö ára gömul hljómsveit og á tónleikunum um helgina eru söng og hljóðfæraleikararnir tólf talsins.

Sungin verða skemmtileg Eyjalög sem allir þekkja og textum varpað á vegg svo allir geti sungið með. Sögum af höfundum og ljóðum er síðan fléttað inn í dagskrána. Enginn sem unnir skemmtilegum söng og tónlist í anda Eyjamanna má missa af þessum viðburði.

Aðgangseyrir aðeins kr. 1.000,-