Eyrarbakki er í stóru hlutverki í nýjasta myndbandi hljómsveitarinnar Retro Stefson við lagið „Skin“ sem er það fyrsta af væntanlegri plötu hljómsveitarinnar.
Í myndbandinu syngja og dansa Unnsteinn Manúel og Haraldur Ari um götur Eyrarbakka og kemur þorpið virkilega skemmtilega út á skjánum.
„Þetta er dálítið eins og trailer af einhverri feel-good mynd,“ segir Unnsteinn Manúel í samtali við Vísi. „Þegar við komum fyrst til Íslands, ég og Logi bróðir, þá vorum við í sumarbústað á Eyrarbakka í sumarfríi. Þannig að við eigum góðar minningar þaðan.“
Það er góður föstudagsfílingur í þessu lagi. Kíkið á það hér fyrir neðan og hækkið í græjunum.