Það eru forréttindi að fá tækifæri til að vera bæjarstjóraefni Samfylkingar og félaga í Sveitarfélaginu Ölfusi. Ég tók það verkefni að mér vegna þess að sú sýn sem framboðið leggur áherslu á varðandi vinnubrögð, stjórnsýslu og samfélag fellur vel að mínum eigin gildum.
Ég trúi á samvinnu, samtal og traust. Ég trúi því að bestu ákvarðanirnar verði til þegar fólk fær raunverulegt tækifæri til að taka þátt, koma sjónarmiðum sínum á framfæri og hafa áhrif á eigið samfélag. Í Ölfusi býr mikill kraftur. Verkefni næstu ára er að virkja þann kraft betur.
Stóreflt nefndakerfi og heimastjórnir
Við viljum efla nefndakerfið og gera það að raunverulegum vettvangi samtals, stefnumótunar og þátttöku. Nefndir eiga ekki aðeins að vera formsatriði í stjórnsýslunni heldur lifandi vettvangur þar sem ólík reynsla, þekking og sjónarmið fá að njóta sín.
Sérstaklega viljum við koma á heimastjórnum fyrir dreifbýlið. Dreifbýlið í Ölfusi er fjölbreytt og víðfeðmt og þarf sterka rödd inn í ákvarðanatöku sveitarfélagsins. Heimastjórnir geta orðið mikilvægur farvegur fyrir samtal um þjónustu, innviði, skipulag, samgöngur og framtíð byggðanna. Heimastjórnir eru ólíkar almennum nefndum að því leytinu til að dreifbýlið kýs sjálft meirihluta nefndarmanna beinni íbúakosningu.
Meira samtal — fyrr í ferlinu
Við viljum stórauka íbúasamráð í öllum málaflokkum. Það á sérstaklega við um skipulagsmál og atvinnuuppbyggingu, þar sem ákvarðanir geta haft mikil áhrif á nærumhverfi fólks, ásýnd sveitarfélagsins og framtíðarsýn samfélagsins.
Íbúasamráð á ekki að hefjast þegar allt er nánast ákveðið. Það á að hefjast fyrr, þegar raunverulegt svigrúm er til að hlusta, ræða ólíkar leiðir og móta betri niðurstöðu. Öflug atvinnuuppbygging og gott samfélag fara best saman þegar ákvarðanir eru teknar af yfirvegun, með gagnsæi og í samtali við íbúa.
Betra Ölfus
Við viljum líka innleiða hugmyndina um Betra Ölfus — samráðsvettvang þar sem íbúar geta komið með hugmyndir að verkefnum og tekið þátt í að forgangsraða þeim. Fyrirmyndin er meðal annars Betri Reykjavík, þar sem íbúar hafa getað sett fram hugmyndir, tekið þátt í samráði og haft áhrif á verkefni í sínu nærumhverfi.
Hugmyndin er einföld: sveitarfélagið tekur ákveðið fjármagn til hliðar og íbúar fá að koma með tillögur að verkefnum og forgangsraða þeim. Þetta gætu verið framkvæmdir, úrbætur í nærumhverfi, leik- og útivistarsvæði, gönguleiðir, lýsing, fegrun eða önnur verkefni sem skipta íbúa máli í daglegu lífi.
Þannig fær fólk ekki bara að segja sína skoðun — heldur hafa raunveruleg áhrif.
Samfélag byggt á trausti
Ölfus stendur frammi fyrir stórum tækifærum. Hér er öflugt atvinnulíf, fjölbreytt byggð, náttúrugæði og samfélag sem getur vaxið á góðum grunni. En til þess þarf að byggja upp traust, innleiða vinnubrögð samráðs og tryggja að fleiri fái sæti við borðið.
Til að hrinda þessari sýn í framkvæmd þarf bæjarstjóra sem trúir á þessi vinnubrögð og vill innleiða þau af festu, yfirvegun og í góðu samstarfi við kjörna fulltrúa, starfsfólk sveitarfélagsins og íbúa. Það er verkefni sem ég er bæði tilbúin og spennt að takast á við.
Við viljum opnara og virkara sveitarfélag sem byggir á samtali, samvinnu og gagnsæjum vinnubrögðum. Sveitarfélag þar sem íbúar finna að rödd þeirra skiptir máli.
Þannig virkjum við kraftinn í samfélaginu.
Bryndís Gunnlaugsdóttir
Bæjarstjóraefni Samfylkingar og félaga í Sveitarfélaginu Ölfusi