Einhverjir umfangsmestu þungaflutningar á Íslandi verða í maí og júní þegar 14 vindmyllur verða fluttar frá Þorlákshöfn í Vaðölduver, sunnan Sultartangalóns í Rangárþingi ytra. Hér fylgir stutt samantekt á því hvernig þessum flutningum verður háttað og hvar hægt verður að nálgast frekari upplýsingar, svo að sem minnstar líkur verði á óþarfa raski fyrir íbúa, fyrirtæki og ferðamenn.
Flutningsleiðin
Flutningarnir verða í tveimur áföngum, vor/sumar 2026 og vor/sumar 2027, og taka um 7–9 vikur í hvort skipti. Gert er ráð fyrir að ekið verði 6 kvöld og nætur vikunnar, en hlé verður gert á laugardagskvöldum og aðfaranótt sunnudags. Flutningsleiðin er um 130 kílómetrar frá Þorlákshöfn að Vaðölduveri um Ölfus, Árborg, Flóahrepp, Ásahrepp og Rangárþing ytra.
Alls verða farnar 300–400 ferðir þar sem hver flutningalest sérútbúinna bíla getur orðið allt að 250 metrar að lengd. Meðalhraði er áætlaður að verði um 30 km/klst og ferðin frá Þorlákshöfn í Vaðölduver taki því yfirleitt um 4–6 klukkustundir.
Lögreglan tryggir öryggi
Lögreglan á Suðurlandi stýrir öllum veglokunum og annarri umferðarstjórnun og fylgir flutningalestunum. Hún áætlar hvaða vegköflum er lokað tímabundið hverju sinni og hvenær opnað er á ný, í nánu samstarfi við Vegagerðina. Þar sem þungaflutningarnir eru mjög stórir verður á ákveðnum köflum ekki unnt að mæta flutningabílum eða taka fram úr þeim og því er afar mikilvægt að vegfarendur kynni sér tímasetningar og lokanir áður en lagt er af stað.
Vegbætur með Vegagerðinni
Verkefnið kallar á ýmsar vegabætur á flutningsleiðinni. Þar má nefna uppbyggingu um 13 km kafla á Landvegi ásamt nýrri brú. Þá verður nokkrum gatnamótum á leiðinni breytt því flutningsvagnarnir þurfa svigrúm fyrir víðari beygjur en venjuleg ökutæki. Við vinnum náið með Vegagerðinni að því að breikka og styrkja vegi þannig að þeir standist álagið af þessum miklu flutningum. Markmiðið er skýrt: vegir og vegamót eiga ekki að vera verri að verkefninu loknu heldur í það minnsta jafngóð og í flestum tilvikum betri, fyrir alla sem ferðast um svæðið til framtíðar.
Upplýsingagjöf
Landsvirkjun leggur áherslu á opna og gagnsæja upplýsingagjöf um flutningana. Sérstök upplýsingasíða er á slóðinni www.landsvirkjun.is/flutningar, þar sem finna má kort af flutningsleiðinni, áætlaðar dagsetningar, upplýsingar um lokanir og hjáleiðir og svör við algengum spurningum. Þungamiðja upplýsingagjafar í rauntíma meðan á flutningum stendur verður þó á vefnum www.umferdin.is sem Vegagerðin stýrir og hefur gert um árabil með góðum árangri. Einnig mun kortavefurinn Google Maps verða uppfærður í samræmi við upplýsingar frá Vegagerðinni og lögreglu.
Með þessum hætti vonumst við til að íbúar á Suðurlandi, fyrirtæki og gestir á svæðinu geti skipulagt ferðir sínar með góðum fyrirvara og að flutningarnir gangi sem greiðast fyrir sig með sem minnstri röskun á daglegu lífi.
Gunnar Aron Ólason
Upplýsingafulltrúi nýframkvæmda hjá Landsvirkjun
gunnar.aron.olason@landsvirkjun.is