Ég hef á liðnu kjörtímabili verið formaður markaðs-, menningar- og jafnréttismálanefndar Rangárþings ytra og hef haft mikla ánægju af því starfi. Að starfa í stjórnsýslu hefur gefið mér innsýn í hvað það er sem skiptir máli í litlu og samheldnu samfélagi þar sem flestir þekkja flesta. Við viljum að stóru málin séu alltaf í umræðunni. Skóla og menntamál, aðgengi að heilbrigðisþjónustu og samgöngur eru dæmi um stór mál sem alltaf þarf að vera að huga að, halda í góðum farvegi og sinna og það hefur svo sannarlega verið gert á síðasta kjörtímabili undir stjórn núverandi meirihluta, Á-listans. Margt er enn á teikniborðinu en almennt gengur vel að byggja upp eins og dæmin sanna og sveitarfélagið okkar stendur vel að vígi á mörgum sviðum þeirra mála og mun Á listinn halda þeirri uppsveiflu áfram, fái hann umboð til.
Í störfum mínum með markaðs-, menningar- og jafnréttismálanefndinni hef ég áttað mig á því að hin svokölluðu litlu mál skipta ekki síður máli. Uppákomur fyrir börn og fullorðna til að hittast og gleðjast, þurfa ekki allar að vera á stærð við Töðugjöld. Litlar og einfaldar samkomur eins og að kveikja saman á jólatrénu litar samfélagið og hristir okkur saman. Á-listinn styður við slíkar samkomur og hefur eflt menningarþáttöku íbúa með ýmsum hætti, meðal annars með úthlutun menningarstyrks tvisvar á ári og kaffisamsæti eldri borgara þar sem almennum borgurum er gert hátt undir höfði með tilnefningu til Samborgara ársins.
Einnig er mikilvægt að hlúa vel að ungmennum okkar, sjá til þess að þau eigi góðar æskuminningar og tengsl við heimahaga sína svo þau finni að þegar þau verða tilbúin til að finna sér framtíðarbúsetu fyrir sig og fjölskyldur sínar, kannski að loknu námi, að þá sé Rangárþing ytra þeirra staður. Við viljum að næstu kynslóðir sjái að verið sé að ryðja braut fyrir þau til að taka við og halda áfram þessari mikilvægru uppbyggingu og að hér sé pláss og möguleikar til stækkunar, fjölgunar starfa í öllum geirum atvinnulífs en einnig að börnin þeirra fái að njóta áhyggjulausrar barnæsku í góðum og vönduðum leik-og grunnskólum.
Á-listinn vill styðja við faglega og góða uppbyggingu á öllum sviðum er varða fjölskyldur, hvort sem um er að ræða í skólamálum, íþróttamálum eða frístundum. Með Á-listanum getum við öll horft til bjartrar framtíðar með opinni og gegnsærri stjórnsýslu, þar sem vel er farið með fé, hlúð að íbúum og byggt upp með skynsamlegum og stöðugum hætti, okkur öllum til farsældar.
Ég óska eftir þínu atkvæði í sveitarstjórnarkosningunum þann 16. maí næstkomandi.
X-Á
Berglind Kristinsdóttir
Skipar 10. sæti Á-listans í Rangárþingi ytra