Samfylkingin mun á næstu dögum og vikum kynna stefnumál flokksins fyrir sveitarstjórnarkosningar í vor. Uppleggið er; hvernig léttum við þér lífið?
Það hefur sárlega vantað ungt fólk í framboð til sveitarstjórna. Í síðustu kosningum hefur kosningaþátttaka yngsta kjósendahópsins verið lítil og farið minnkandi. Þegar ég ákvað að gefa kost á mér á lista S og óháðra í Árborg var það til þess að vekja athygli á og berjast fyrir þeim málefnum sem brenna á ungu fólki sem er að fara að stíga sín fyrstu skref út í lífið.
Setjum þak á leikskólagjöld
Það þarf að treysta ungu fólki til áhrifa. Þar er af nógu að taka og mun ég á næstunni fjalla um þau málefni í greinum sem þessari.
Ég hef átt heima í Árborg frá því að ég var tæplega 3 ára gömul þegar fjölskyldan flutti úr Skeiða- og Gnúpverjahreppi í Árborg. Skólagangan var Hulduheimar, Vallaskóli og FSu. Allt mjög góðir skólar þar sem var gott að vera.
Hér er gott að eiga heima og hef notið þess að taka þátt í allskyns tómstundum; fótbolta með UMFS, þátttöku í kór FSu og söngkeppni framhaldsskólanna fyrir hönd FSu. Þetta eru forréttindi og hefur mótað mig á víðtækan hátt. Ég vil tryggja að allir hafi aðgang að slíku starfi óháð því hver efnahagur fjölskyldu þeirra er.
Kristrún Frostadóttir, forsætisráðherra, komst vel að orði í stefnuræðu sinni á flokksstjórnarfundi Samfylkingarinnar um síðustu helgi þegar hún sagði; „Íslandi vegnar best þegar við tökum ábyrgð hvert á öðru — þegar réttur og skylda fara hönd í hönd, og allir leggja sitt af mörkum. Þetta er okkar hugmyndafræði: Það sem aðgreinir Samfylkingu og sósíaldemókrata frá öllum öðrum flokkum.“
Í anda orða Kristrúnar þurfum við að létta barnafólki lífið. Þau bera þyngstu byrðarnar í samfélaginu, koma upp fasteign fyrir fjölskylduna og börnunum í gegnum skólastigin.
Eitt af því sem er mikilvægt að gera og er í stefnudrögum flokksins er að setja þak á leikskólagjöld og taka upp 100% systkinaafslátt. Þá er mikilvægt að lögfesta rétt til leikskólavistar að loknu fæðingarorlofi.
Þá þarf einnig að brúa bilið á milli fæðingarorlofs og leikskóla í eitt skipti fyrir öll með samstilltu átaki ríkis og sveitarfélaga. Þannig stöndum við með barnafjölskyldum landsins og léttum undir með þeim í basli hins daglega lífs. Þá eru fríar strætóferðir og ríflegir frístundastyrkir mikilvæg til þess að efla þátttöku í íþróttum og tómstundum, óháð efnahag.
Elísabet Björgvinsdóttir
Skipar 4. sæti á lista Samfylkingarinnar og óháðra í Árborg