Þessa dagana eru margar fjölskyldur að velta fyrir sér hvert stefnan skuli tekin um verslunarmannahelgina. Margt er í boði vítt og breytt um landið og tilboðin mörg og spennandi. Ég er með „góða hugmynd“ fyrir ykkur eins og 6 ára ömmustrákurinn minn segir gjarnan þegar verið er að skipuleggja hlutina. Takið stefnuna á Sauðárkrók að þessu sinni og skemmtið ykkur á Unglingalandsmóti UMFÍ.
Allt frá árinu 1992 hafa Unglingalandsmót UMFÍ verið haldin. Þau eru ein stærsta vímefnalausa íþrótta- og fjölskylduhátíð á Íslandi fyrir börn og ungmenni á aldrinum 11 til 18 ára. Tilgangur þeirra er að efla samstarf og samheldni, hvetja til almennrar hreyfingar og skapa skemmtilega samveru í bland við keppni og skemmtun.
Mótin eru opin öllum ungmennum óháð því hvort þau æfi íþróttir eða ekki. Ekki þarf að vera skráð í íþróttafélag og val er um að koma með eigið lið eða taka þátt án þess að
vera í liði en þá sjá mótshaldarar um að finna lið fyrir viðkomandi. Á mótinu er lögð áhersla á opið og jákvætt umhverfi og eiga allir að geta tekið þátt á eigin forsendum.
Keppt er í fjölda greina og boðið verður upp á skemmtilega fjölskyldu- og afþreyingar viðburði m.a. ævintýragarð, danskeppni, listasmiðjur, jóga, fjölskylduhlaup og sandkastalagerð. Frá morgni til kvölds iðar mótssvæðið af lífi og ættu allir að geta fundið eitthvað við sitt hæfi og því ætti engum að leiðast á Króknum um verslunarmannahelgina.
Unglingalandsmót er frábær viðburður í samfélagi okkar. Á mótunum gefast ungmennum góð tækifæri til að reyna á sig í leik og keppni, hitta vini og kunningja og ekki síst eignast nýja vini og kunningja.
Landsmót eru öflug forvörn þar sem hreyfing og hollusta haldast í hendur. Hreyfing og keppni eru gulls ígildi og mótin hafa sannað að góð lýðheilsa er eitt mikilvægasta verkefnið í okkar velferðarríki. Munum að gott lýðheilsustarf snýst um virðingu fyrir sjálfum sér og öðrum. Á Unglingalandsmótum er markmiðið að hlúa að öllum og hverjum og einum gert kleift að njóta sín á eigin forsendum enda er það í takt við góða íþróttastefnu.
Ég hvet Sunnlendinga til að fjölmenna norður, í fjörðinn fagra, og taka þátt í ódýrri, heilbrigðri og skemmtilegri hátíð á Sauðárkróki, verslunarmannahelgina 2026.
Allar upplýsingar um mótið er hægt að nálgast á heimasíðu UMFÍ. Skráningar á mótið þurfa að berast fyrir miðnætti sunnudaginn 26. júlí næstkomandi.
Guðríður Aadnegard
Formaður HSK