Hvað erum við að kjósa um í Hveragerði? Fyrir fjórum árum fór allavega ekki á milli mála hver stóru málin voru. En hvað erum við að kjósa um núna? Að stórum hluta liggur þegar fyrir hvaða verkefni næsta bæjarstjórn þarf að takast á við. Ókláruð verkefni og skuldbindingar síðustu ára hafa í raun afmarkað svigrúmið og mótað verkefni næstu bæjarstjórnar.
Þrátt fyrir að skuldir sveitarfélagsins hafi aukist um rúmlega 4 milljarða eru enn stór verkefni bæði ókláruð og ófjármögnuð. Þar má helst nefna viðbyggingu við íþróttahúsið og uppbyggingu skólphreinsistöðvar, þar sem framkvæmdir hafa ekki einu sinni hafist. Um er að ræða verkefni sem munu kosta milljarða til viðbótar við það sem þegar hefur verið greitt fyrir.
Þessi staða þýðir að næsta bæjarstjórn þarf að vanda til verka og það endurspeglast sérstaklega ef fjárhagsáætlanir sveitarfélaga eru bornar saman. Miðað við fyrirliggjandi gögn á heimasíðu Sambands íslenskra sveitarfélaga verður Hveragerðisbær með fjórða hæsta skuldahlutfall allra sveitarfélaga á Íslandi 2029 ef fer sem horfir. Svigrúmið til nýrra verkefna er því takmarkað og skiptir forgangsröðun og ábyrg fjármálastjórn gríðarlega miklu máli.
Hvað eru þá íbúar að kjósa um?
Þessar kosningar snúast fyrst og fremst um traust. Traust til þess að farið verði með fjármuni sveitarfélagsins af ábyrgð. Traust til þess að verkefni verði kláruð. Traust til þess að ákvarðanir séu teknar með langtíma hagsmuni íbúa að leiðarljósi. Traust til þess að íbúar fái upplýsingar um stöðu mála. Traust til þess að kjörnir fulltrúar starfi af ábyrgð fyrir betri lífsgæði.
Eitt af lykilmálum D-listans er að taka til í rekstri sveitarfélagsins með því að nálgast verkefnin af skynsemi og miðað við greiðslugetu sveitarfélagins. Við leggjum áherslu á skýra forgangsröðun, hagkvæmar lausnir og að farið sé vel með sameiginlegt fé íbúa. Markmiðið er að byggja upp sterkan rekstur sem skapar raunverulegt svigrúm til framtíðar, án þess að fórna grunnþjónustu, lífsgæðum eða bæjarbrag.
Með því að fara vel með sameiginlegt fé íbúa getum við betur tryggt að vöxtur Hveragerðis sé á okkar forsendum. Við styðjum áframhaldandi þróun og fjölbreytt tækifæri en það er skýrt ákall frá íbúum um að sveitarfélagið stækki ekki of ört. Við ætlum að hlusta á það.
Verkefnin framundan eru stór og áskoranirnar raunverulegar. Þess vegna skipta vinnubrögð og forgangsröðun máli. Veljum trausta stjórnun og ábyrga uppbyggingu til framtíðar, fyrir betri lífsgæði.
Ingimar Guðmundsson
Oddviti og bæjarstjóraefni D-listans í Hveragerði