Forsetaákallið „Tölum saman“ fór fram í mörgum skólum á landinu laugardaginn 10. október og þá einnig í Fjölbrautaskóla Suðurlands. Hugmyndin var að ungt fólk myndi leiða samtal þar sem verið var að deila því sem skiptir okkur máli: vonum okkar, gildum og hugmyndum um framtíðina.
Af heimasíðu verkefnisins: „Fyrir fjörutíu árum settust leiðtogar tveggja stórvelda niður til samtals í Höfða, á tímum mikillar spennu og ótta í heiminum. Þeir leystu ekki allan ágreining sinn, en samtalið átti þátt í að breyta gangi sögunnar.“
Á tímum umbreytinga og tækniþróunar skiptir máli að staldra við, hlusta og tala saman og þess vegna var boðið til þjóðarsamtals undir yfirskriftinni “Hvernig samfélag viljum við skapa saman?” Umræðuefnin sem lagt var upp með, voru eftirfarandi: Framtíðin, gervigreind, húsnæði, menntun, náttúran, samfélagið, samskipti, tungumálið og umburðarlyndi.
Skipulagið gekk mjög vel í skólanum, nemendur stóðu sig frábærlega bæði við skipulagningu og í sjálfu spjallinu, þeir sáu um að koma tæknimálum í lag og voru til fyrirmyndar í alla staði. Dagurinn hófst kl. 10:00 þegar húsið opnaði og við komum okkur fyrir í anddyrinu í verknámshúsinu í Hamri, með hvítum dúkum, blómaskreytingum, kaffi og bakkelsi frá GK bakarí.
Frá klukkan 10:30-13:00 fór fram þjálfun lóðsa, tímalínan á samtalinu var rædd og nemendur settu upp stórskjá og tölvur til þess að geta streymt beint frá skipuleggjundum frá klukkan half tvö en á þeim tíma opnaði einnig húsið fyrir almenningi. Spjallið sjálft stóð frá 14:00-17:00 og hófst á því að Halla Tómasdóttir ávarpaði samkomurnar um allt land í upphafi samtalsins.
Dagurinn var ágætis blanda af hátíðarstemningu, léttu hjali og alvörugefnu samtali. Þess má geta að umræður stóðu lengi hjá okkur en við getum ekki leynt því að þátttakan hefði mátt vera betri – ef viðburðurinn verður árlegur væri gaman að sjá fleiri taka þátt, ekki síst fullorðna fólkið.
Svo vitnað sé beint í heimasíðu verkefnisins að lokum: „Kannski breytum við ekki heiminum á einum degi en orð eru til alls fyrst og vonin vex þegar við tökum virkan þátt.“
Kærlige hilsner,
Ida Lön, dönskukennari og Sóley Vigfúsdóttir, fulltrúi NFsu
