Það er hvorki fyrir tilviljun né vegna heppni að samfélag okkar hér í Rangárþingi ytra er jafn gott og raun ber vitni. Hér býr gott fólk sem þykir vænt um nærumhverfi sitt og lætur sig það varða.
Á-listinn er skipaður af fjölbreyttum hópi fólks sem vill og getur látið til sín taka.
Veganestið sem listinn mun fá frá íbúunum í aðdraganda kosninganna er afar mikilvægt fyrir þær áherslur sem ráða munu för að kosningum loknum. Þess vegna eru málefnafundirnir sem Á-listinn boðar til á næstu dögum mikið tilhlökkunarefni. Þar munum við eiga samtal um áherslumál framboðsins en ekki síður mætum við til samtalsins til þess að hlusta og skilja.
Fyrir mig persónulega skipta þeir miklu máli. Enda þótt ég þekki vel til heimahaganna í Rangárþingi ytra þá kem ég nú í fyrsta sinn til fundar við íbúana sem frambjóðandi og að auki sem verðandi sveitarstjóri ef Á-listinn fær endurnýjað umboð. Þess vegna mun ég leggja vel við hlustir.
Það er verkefni allra kjörinna fulltrúa að móta stefnu og forgangsraða verkefnum í takti við þarfir og vilja íbúanna. Það er svo verkefni sveitarstjórans hverju sinni að koma hlutunum í verk. Ég hlakka til að taka þátt í pólitísku starfi og stefnumótun Á-listans. Það er sömuleiðis tilhlökkunarefni að nálgast verkefni sveitarstjórans með þeim hætti að njóta trausts óháð flokkum og framboðum. Þar, rétt eins og svo víða annars staðar, reynir á góða samvinnu og njóta trausts allra íbúa ekki flokka og framboða.
Samtalið á málefnafundunum sem við efnum til í Þykkvabæ miðvikudaginn 8. apríl, á Laugalandi 9. apríl og á Hellu laugardaginn 11. apríl er ekki síður mikilvægt. Ég vona að þú sjáir þér fært að mæta. Í þessu stefnumótandi spjalli skiptir hver rödd miklu máli.
Ég vil að lokum minna íbúagátt á Facebook síðu Á-listans og á vefsíðu mína, eirikurvilhelm.is. Á henni geta þeir sem ekki komast á fundina okkar sent okkur skilaboð og við munum hafa samband um hæl.
Eiríkur Vilhelm Sigurðarson
Sveitarstjóraefni Á-listans í Rangárþingi ytra