Kæru íbúar Grímsnes- og Grafningshrepps,
Nú fer að líða að kjördegi og íbúar hér, líkt og um allt land, standa frammi fyrir mikilvægu vali um framtíð sveitarfélagsins næstu fjögur árin. Kosningabaráttan hér í sveit hefur eflaust ekki farið framhjá mörgum, en tvö framboð bjóða nú fram, og A-listinn okkar er annað þeirra. Síðustu vikur hafa íbúar Grímsnes- og Grafningshrepps orðið vitni að kosningabaráttu sem á köflum hefur farið langt út fyrir það sem eðlilegt getur talist í litlu samfélagi.
Kosningabarátta á að snúast um málefni, ábyrgð og framtíðarsýn. Í stað þess að ræða lausnir og raunveruleg verkefni sveitarfélagsins hefur umræðan mikið snúist um tortryggni, dylgjur, árásir á stjórnsýslu sveitarfélagsins og sífelldar tilraunir til að mála samfélagið okkar sem einhvers konar átakasvæði. Slíkt er ekki líklegt til að styrkja sveitarfélagið en því miður er neikvæðni og múgæsingur stundum auðveldari leið til að ná athygli en ábyrg málefnavinna.
Við í A-listanum höfnum þeirri pólitík.
Sveitarfélagið okkar á skilið meira en það og íbúar þess vilja uppbyggilega umræðu.
Á íbúafundum og í samtölum síðustu daga hafa ákveðnar spurningar verið áberandi:
– Hvernig þjónar það samfélaginu að tala sveitarfélagið niður?
– Hvernig byggir maður upp traust með því að ala á vantrausti?
– Hvernig á að efna þau kosningaloforð sem sett hafa verið fram án ábyrgðar og útskýringa?
Þetta eru eðlilegar spurningar og þær skipta máli.
A-listinn býður fram í Grímsnes- og Grafningshreppi í fyrsta sinn. Við sem skipum listann komum úr ólíkum áttum innan sveitarfélagsins, með mismunandi reynslu, bakgrunn og þekkingu. Það sem sameinar okkur er það að okkur þykir vænt um samfélagið okkar og viljum bjóða fram krafta okkar til að vinna fyrir íbúa og aðra hagsmunaaðila af ábyrgð, heilindum og virðingu.
Engin stjórnsýsla er hafin yfir gagnrýni og engin sveitarfélög laus við áskoranir. Það skiljum við í A-listanum vel. Við höfum mótað stefnu fyrir næstu fjögur árin miðað við þau verkefni sem hafa verið í undirbúningi og eru áfram brýn, en einnig komið með okkar sýn og styrkleika til að tækla önnur mál.
Það er auðvelt að skapa hávaða. Það er auðvelt að skrifa dramatískar greinar, kasta fram ásökunum og ala á tortryggni gagnvart starfsfólki sveitarfélagsins og stjórnsýslunni. Það er miklu erfiðara að axla ábyrgð, vinna með fólki og taka þátt í þeirri daglegu vinnu sem þarf til að efla samfélagið og halda því gangandi. Það eru skýr mörk milli málefnalegrar umræðu og þess að grafa markvisst undan trausti til starfsfólks og stofnana sveitarfélagsins.
Þau mörk hafa því miður of oft verið þverbrotin í þessari kosningabaráttu.
Við frambjóðendur A-listans sem gefum kost á okkur í sveitarstjórnarsæti höfum valið aðra leið. Í heimsóknum okkar til íbúa sveitarfélagsins höfum við verið hvött til þess að halda okkur fyrst og fremst við málefnin í þessari baráttu og gert það, þó vissulega hefðu margir viljað sjá okkur stíga fastar til jarðar þegar kemur að óvæginni umræðu. En íbúar Grímsnes- og Grafningshrepps eiga skilið betur en leðjuslag og læti. Þeir eiga skilið sveitarstjórn sem getur unnið saman, tekið erfiðar ákvarðanir af ábyrgð og horft fyrst og fremst til hagsmuna samfélagsins alls.
Kosningar snúast nefnilega ekki bara um það hver talar hæst eða skrifar flestar greinar. Þær snúast um það hverjum er treystandi til að leiða samfélagið áfram þegar kosningabaráttunni lýkur.
Við erum öflugt samfélag í vaxandi sveitarfélagi. Við viljum byggja það upp áfram í samvinnu við íbúa og með jákvæðni, styrk og framtíðarsýn að leiðarljósi.
Kæru íbúar, á laugardag er valið ykkar.
Greinarhöfundar eru fimm efstu frambjóðendur A-listans:
Guðmundur Finnbogason, oddviti A-listans
Rebekka Lind Guðmundsdóttir, 2. sæti
Bergur Guðmundsson, 3. sæti
Ragnheiður Eggertsdóttir, 4. sæti
Pétur Thomsen, 5. sæti