Við viljum byrja á að þakka Fanneyju Björgu og Guðrúnu Lilju fyrir áskorunina sem þær settu fram í grein hér á sunnlenska.is um málefni fólks með heilabilun. Greinin dregur skýrt fram þá miklu áskorun sem við stöndum frammi fyrir vegna ört vaxandi hóps fólks með heilabilun og aukins álags á aðstandendur og þjónustukerfi sem afleiðingar af því. Við tökum heilshugar undir að þörf er á samfelldri, aðgengilegri þjónustu sem við viljum að einkennist fyrst og fremst af hlýju og einstaklingsbundnum lausnum.
Heildstæð þjónusta og velferðartækni
Stefna Samfylkingarinnar og óháðra í Árborg byggir á því að þjónusta við fólk með heilabilun sé hluti af heildstæðri velferðarþjónustu sveitarfélagsins. Það er algert lykilatriði að upplýsingar um þjónustuna sé aðgengilegar, að áhersla sé á snemmtækan stuðning og gott samstarf milli heilbrigðis- og félagsþjónustu, þannig að fólk upplifi öryggi í samskiptum við þjónustukerfið. Þjónustuaðilar hafa ríkar skyldur þegar kemur að frumkvæði að upplýsingagjöf til þjónustunotenda og aðstandenda.
Við viljum efla enn frekar samstarfið á milli heilbrigðis- og velferðarþjónustu í Árborg og nýta m.a. velferðartækni á ábyrgan hátt til að auka öryggi í heimahúsum, styðja við sjálfstæði þjónustunotenda ásamt því að vinna gegn einangrun. Með því að nýta velferðartækni skapast aukið svigrúm hjá starfsfólki til samveru með notendum
þjónustunnar.
Samhliða þessu viljum við styðja öflugt heilsueflingar- og félagsstarf eldra fólks með aðstöðu og fræðslu. Slík virkni er mikilvæg forvörn gegn einsemd og minnkandi færni.
Tillaga Samfylkingar um félagslegan stuðning við aðstandendur samþykktur
Aðstandendur heilabilaðra bera oft þunga umönnunarbyrði sem getur hreinlega leitt til alvarlegs heilsubrests. Því er algert lykilatriði að styðja þá markvisst með fræðslu og ráðgjöf ásamt félagslegum stuðningi.
Í þessu samhengi viljum við nefna að undirritaður bæjarfulltrúi Samfylkingar lagði fram tillögu í bæjarráði Árborgar sl. haust um félagslegan stuðning við aðstandendur einstaklinga með heilabilun.
Tillagan hefur verið samþykkt og hefur leitt til innleiðingar nýs þjónustuúrræðis þar sem starfsmaður er með viðveru hjá einstaklingi með heilabilun á heimili hans á meðan maki eða annar umönnunaraðili fær tíma til að sinna eigin þörfum, félagslífi eða öðrum erindum. Markmiðið með þjónustunni er að draga úr álagi, auka lífsgæði beggja aðila og styðja við áframhaldandi búsetu í heimahúsi.
Þetta sýnir þá nálgun sem Samfylkingin vill standa fyrir í þjónustu við fólk með heilabilunarsjúkdóma, sveigjanlega og einstaklingsmiðaða þjónustu sem grípur fólk fyrr og getur dregið úr álagi á aðstandendur.
Úrræði til framtíðar
Það er ljóst að sveitarfélög geta ekki leyst áskoranir vegna heilabilunar ein og sér. Við viljum því beita okkur af festu gagnvart ríkinu um fjölgun dagdvalarrýma í Vinaminni og Árbliki ásamt fjölgun hjúkrunarrýma. Það er afar mikilvægt að sveitarfélög geri langtímaáætlanir um uppbyggingu þjónustuúrræða sem er í takt við lýðfræðilegri
þróun.
Að lokum
Málefni fólks með heilabilun og aðstandenda þeirra snerta okkur öll, beint eða óbeint. Við þurfum skýra framtíðarsýn í málaflokknum og aukið vægi hans í stefnumótun sveitarfélagsins.
Í bæjarstjórn Árborgar viljum við vinna að faglegri og framsýnni þjónustu, þar sem tekið er utan um fólkið okkar, þar sem hver og einn fær stuðning á réttum tíma og þjónustunotendur ásamt aðstandendum upplifa öryggi í samskiptum við kerfið. Það er sameiginleg ábyrgð okkar allra.
Arna Ír Gunnarsdóttir
Félagsráðgjafi, bæjarfulltrúi S-lista í Árborg
Margrét Björk Ólafsdóttir
Hjúkrunarstjóri, í 2. sæti á framboðslista Samfylkingar og óháðra í Árborg