Í Grímsnes- og Grafningshreppi hefur byggst upp öflugt starf fyrir eldri borgara. Árið 2025 var félagið 60+ formlega stofnað, í upphafi gengu 20 manns í félagið en núna erum við félagar orðnir rúmlega 100 talsins. Það sýnir að það er þörf á félagi 60+ hér í hreppnum sem einnig er þátttakandi í og fullgildur meðlimur í Landsambandi eldri borgara. Það er gott að eldast í Grímsnesi og ég vil beita mér fyrir því að eldri íbúar njóti áfram skilnings og stuðnings frá stjórnendum sveitarfélagsins. Starfið hefur einkennst af mikilli uppbyggingu, samheldni og ekki síst metnaði til að skapa vettvang sem eflir lífsgæði, heilsu og félagslega þátttöku eldri borgara í sveitarfélaginu okkar.
Við hófum á undanförnu starfsári á því að leggja grunn að félaginu, bæði formlega og faglega. Unnið var að skráningu félagsins, stofnun bankareiknings og mótun skipulags, auk þess sem undirbúningur aðalfundar var stór þáttur í starfinu fyrstu mánuðina. Á þessum tíma fundaði stjórnin reglulega og markvisst, með það að markmiði að koma starfseminni á skýran og traustan farveg. Það var mikilvægt að skapa góða umgjörð frá upphafi, svo félagið gæti vaxið og dafnað til framtíðar.
Frá fyrstu dögum hefur áherslan verið skýr: Að skapa lifandi og aðgengilegt félagsstarf. Heilsubótargöngur hafa þar verið burðarás í starfseminni og hafa ekki aðeins stuðlað að aukinni hreyfingu heldur einnig verið mikilvægur vettvangur fyrir samveru og tengslamyndun. Þá hefur félagið staðið fyrir fjölbreyttum viðburðum, þar á meðal opnum húsum, kynningarkvöldum og samverustundum þar sem félagsmenn hafa haft tækifæri til að koma saman, skiptast á hugmyndum og móta starfið með okkur.
Sérstaklega vil ég nefna þorrablót félagsins sem var haldið fyrr á árinu. Það tókst afar vel og sýndi svo ekki verður um villst hversu mikil þörf er fyrir slíka viðburði. Sama má segja um jólamat félagsins sem naut góðrar þátttöku og skapaði hlýja og jákvæða stemningu. Slíkir viðburðir eru ekki aðeins skemmtilegir heldur gegna þeir lykilhlutverki í að rjúfa einangrun og efla samfélagsanda.
Á árinu höfum við einnig unnið að því að byggja upp fræðslustarf innan félagsins. Hugmyndir um námskeið og fyrirlestra hafa verið þróaðar, meðal annars um lífeyrismál, netöryggi og almenna tæknifærni. Þó að ekki hafi allt komist í framkvæmd strax, þá er ljóst að þörfin er til staðar og viljinn mikill. Þetta er þáttur sem við munum halda áfram að efla á komandi starfsári.
Til að styrkja starfsemi félagsins enn frekar var ákveðið að setja á fót nefndir, þar á meðal fræðslunefnd og skemmtinefnd. Með því er markmiðið að dreifa ábyrgð, virkja fleiri félagsmenn og skapa enn öflugra og fjölbreyttara starf. Þá hefur einnig verið rætt um að setja á fót göngunefnd til að halda utan um göngustarfið, sem hefur reynst einn af hornsteinum félagsins.
Samstarf hefur verið okkur afar mikilvægt. Á árinu náðist sá mikilvægi áfangi að ganga frá samstarfssamningi við sveitarfélagið, sem var undirritaður í mars. Með honum er hlutverk félagsins skýrt og tryggður stuðningur til að efla starf fyrir eldri borgara. Þetta er stórt skref fyrir félagið og styrkir stoðir þess til framtíðar. Einnig höfum við átt gott samstarf við Landssamband eldri borgara og önnur félög, auk þess að leita leiða til að tengjast fleiri aðilum í samfélaginu.
Við höfum jafnframt lagt áherslu á að bæta upplýsingagjöf til félagsmanna. Facebook-hópur félagsins hefur verið virkur vettvangur, en við höfum einnig unnið að því að ná til þeirra sem ekki nota rafræna miðla með tölvupóstum og prentuðu efni. Það er okkur mikilvægt að allir hafi jafnt aðgengi að upplýsingum og geti tekið þátt í starfinu.
Eitt það ánægjulegasta sem gerðist á árinu var þegar Félag 60+ hlaut viðurkenningu fyrir framúrskarandi heilsueflandi störf í þágu samfélagsins. Sú viðurkenning er ekki aðeins staðfesting á því starfi sem þegar hefur verið unnið, heldur einnig hvatning til að halda áfram á sömu braut. Með starfsemi félagsins höfum við stigið mikilvægt skref í að draga úr félagslegri einangrun, efla samveru og bæta lífsgæði eldri borgara í sveitarfélaginu. Það er verk sem skiptir máli, fyrir einstaklingana sem taka þátt og samfélagið allt.
Þegar horft er fram á veginn er ljóst að tækifærin eru fjölmörg. Við viljum halda áfram að efla heilsueflandi starf, byggja upp öflugt fræðslustarf og skapa fleiri tækifæri fyrir skemmtilega viðburði. Við viljum einnig styrkja tengsl við samfélagið og fjölga félagsmönnum, svo enn fleiri geti notið góðs af starfinu.
Það er gott að eldast í Grímsnesi og ég vil beita mér fyrir því að eldri íbúar njóti áfram skilnings og stuðnings frá stjórnendum sveitarfélagsins. Við höfum lagt góðan grunn. Nú er komið að því að byggja ofan á hann og A-listinn vill styðja við þá vinnu.
Sigríður Kolbrún Oddsdóttir
Formaður stjórnar 60+ í Grímsnes- og Grafningshreppi
Skipar 10. sæti A-listans