Í Grímsnes- og Grafningshreppi stöndum við á tímamótum. Við búum í einu fallegasta sveitarfélagi landsins, þar sem náttúran, kyrrðin og samfélagið skapa einstök lífsgæði. En fegurðin ein og sér nægir ekki. Við þurfum líka framtíðarsýn, kjark og vilja til að gera sveitarfélagið okkar að eftirsóttasta stað landsins til að búa á.
Ég býð mig fram í 7. sæti á Ö-listanum, Betri sveit fyrir okkur öll, vegna þess að ég trúi því af heilum hug að hér sé hægt að byggja upp samfélag þar sem fjölskyldur vilji setjast að, börn fái framúrskarandi uppeldi og menntun, atvinnulíf fengi að blómstra og eldri íbúar geti notið öryggis og virðingar.
Við eigum að vera sveitarfélag þar sem leik- og grunnskólar eru meðal þeirra bestu á landinu. Sveitarfélag þar sem fólk sér tækifæri til atvinnuuppbyggingar og þar sem við stöndum vörð um bændur og landbúnað, sem eru hluti af sjálfri sálu sveitarinnar. Framþróun og vernd hefða geta nefnilega farið saman ef rétt er á málum haldið.
Við eigum líka að vera stolt af þeirri einstöku samfélagsgerð sem hér hefur byggst upp á Sólheimum. Sólheimar eru ekki aðeins mikilvægur hluti af sögu sveitarfélagsins heldur lifandi dæmi um mannúð, virðingu og samfélag þar sem allir eiga rétt á að njóta sín. Slík gildi eiga að vera leiðarljós í þróun sveitarfélagsins til framtíðar.
Ég skil vel að þeir sem hér eru fæddir og uppaldir, eða hafa búið hér lengi, vilji verja sitt samfélag. Það er eðlilegt. En Ö-listinn er ekki kominn til að „taka yfir“ sveitarfélagið. Þvert á móti viljum við samlagast samfélaginu, vinna með fólki og stuðla að sanngirni og réttlæti fyrir alla íbúa. Það segir sína sögu að bæði á Ö-listanum og meðal stuðningsfólks hans eru einstaklingar sem eiga hér djúpar rætur og hafa alist upp í hreppnum.
Kosningarnar snúast ekki um okkur gegn ykkur. Þær snúast um framtíð sveitarfélagsins okkar.
Næstu fjögur ár mun annað hvort Ö-listinn eða A-listinn leiða sveitarfélagið. Hvor sem hlýtur traust kjósenda, óska ég því framboði innilega til hamingju og velfarnaðar í störfum sínum fyrir samfélagið okkar. Um leið finnst mér rétt að þakka fráfarandi sveitarstjórn fyrir hennar störf, þótt ég hafi ekki alltaf verið sammála öllum ákvörðunum hennar.
En nú er komið að nýjum kafla. Ég trúi því af einlægni að Grímsnes- og Grafningshreppur geti orðið eftirsóttasta sveitarfélag landsins til að búa í samfélag þar sem fjölskyldur, bændur, atvinnulíf, börn, eldri borgarar, fatlaðir og allir þeir sem þurfa á sérstökum stuðningi eða þjónustu að halda finna raunverulega fyrir öryggi, virðingu, framþróun og auknum lífsgæðum.
Við eigum að byggja samfélag þar sem enginn situr eftir og allir finna að þeir skipta máli.
Þess vegna bið ég ykkur um að setja X við Ö þann 16. maí. Með því veljið þið nýja sýn, nýjan kraft og sanngjarna stjórnun fyrir alla íbúa. Ég er sannfærður um að ef Ö-listinn fær traust ykkar munu næstu fjögur ár verða þau bestu í sögu sveitarfélagsins. Íbúarnir munu finna það á eigin skinni.
Heimir Karlsson
Skipar 7. sæti Ö–listans í Grímsnes- og Grafningshreppi