Stjórnmálin eiga ekki fyrst og fremst að snúast um framboð, stjórnmálaflokka eða stefnuskrár þeirra. Þau eiga að snúast um almenning og óskir hans um betra og réttlátara samfélag. Kerfið á ekki að vera til fyrir stjórnmálamennina eða embættismennina. Kerfið á að vera til fyrir fólkið.
- Hlutverk kerfisins er að gera líf fólks einfaldara, ekki flóknara.
- Kerfið á að þróast með samfélaginu, vera sveigjanlegt og laga sig að breyttum tímum.
- Fólkið á ekki að þjóna kerfinu; kerfið á að þjóna fólkinu.
- Og fólkið á svo sannarlega ekki að vera til fyrir stjórnmálamennina. Þeir sem bjóða sig fram til forystu eiga að vera þar fyrir fólkið.
Mín reynsla segir mér að alltof margir stjórnmálamenn eigi það til að gleyma því fyrir hverja þeir starfa, sérstaklega þegar þeir komast til valda. Þeir gleyma því hvaðan valdið kemur — það kemur frá fólkinu.
Það er ekki gott að búa í sveitarfélagi þar sem þetta blasir svona við. Það er einfaldlega vont. Það er vont að búa í sveitarfélagi þar sem meirihlutinn virðist hafa lítinn sem engan áhuga á að eiga raunverulegt samtal við íbúa, hlusta á sjónarmið þeirra eða taka mark á óskum þeirra.
Það er löngu tímabært að þeir sem setjast í valdastóla í umboði fólksins geri sér grein fyrir því að þeir komast ekki lengur upp með innantóm loforð í kosningabaráttu. Sá tími á að vera liðinn.
Tími geðþóttaákvarðana þeirra sem sitja í valdastólum ætti líka að vera löngu liðin.
Við getum byrjað hér, í okkar fallega sveitarfélagi, Grímsnes- og Grafningshreppi, og sýnt í verki hvað það þýðir að stjórna fyrir fólkið. Að hér sé unnið af heilindum, gagnsæi og sveigjanleika, með hagsmuni almennings að leiðarljósi. Auðvitað verður aldrei hægt að uppfylla óskir allra, en það er alltaf hægt að sýna fólki virðingu með því að hlusta, reyna og vinna af heiðarleika.
Grímsnes- og Grafningshreppur er í dauðafæri til að verða fyrirmyndarsveitarfélag. Sveitarfélag þar sem stjórnað er af ábyrgð, með fólkið í forgrunni. Ef við förum þá leið getum við skapað samfélag sem verður enn eftirsóknarverðara að búa í, bæði fyrir þá sem hér búa nú þegar og þá sem vilja setjast hér að.
Ö – listinn, Betri sveit fyrir okkur öll gæti verið eina raunverulega tækifærið sem íbúar sveitarfélagsins fá á næstu árum til að kjósa sanngjarnan, réttlátan og mannlegan meirihluta til að stýra GOGG.
Við megum ekki missa af þessu einstaka tækifæri.
Heimir Karlsson
Skipar 7. sætið á Ö–listanum í Grímsnes- og Grafningshreppi