Grímsnes- og Grafningshreppur hefur alla tíð verið landbúnaðarsamfélag. Hér hafa verið stórbýli frá landnámi, en líkt og víða annars staðar hefur endurnýjun í greininni verið hæg undanfarin ár. Flest erum við þó sammála um að það sé ekki góð þróun. Við viljum sjá landið nýtt, byggðina lifandi og fjölbreytt atvinnulíf í sveitinni.
Þess vegna er mikilvægt að spyrja: Hvernig getum við byggt ofan á það sem fyrir er?
Styrkleikar Grímsnes- og Grafningshrepps bjóða sannarlega upp á tækifæri. Nálægðin við höfuðborgarsvæðið, stöðugur straumur ferðamanna og fjölbreytt landgæði skapa góðar forsendur fyrir frekari uppbyggingu. Við sjáum það vel í nágrannasveitarfélögum okkar hvernig sterk fyrirtæki innan ferðaþjónustu hafa byggst upp og blómstrað á síðustu árum. Þar eru fjölmörg tækifæri sem hægt er að þróa áfram í samvinnu við landbúnað og nærumhverfið.
A-listinn vill stuðla að því að landbúnaður í sveitarfélaginu verði ekki bara lífstílsverkefni heldur geti fólk lifað á verkum sínum og þurfi ekki að sækja vinnu annað til að hafa ofan í sig og á. Til þess þarf sveitarfélagið að styðja við greinina með markvissum hætti.
Eitt af þeim tækifærum sem blasa við er aukin garðyrkja og ræktun til manneldis. Eftirspurn eftir íslenskum og rekjanlegum matvælum fer vaxandi og þar geta bæði stærri og smærri aðilar fundið sér farveg. Til að slíkt geti orðið að veruleika þarf þó að tryggja trausta innviði, þar á meðal aðgengi að heitu og köldu vatni og nægu rafmagni. Sömuleiðis skiptir miklu máli að vegakerfi, girðingar, skálar og önnur aðstaða sem tengist búskap og nýtingu lands sé í góðu ástandi og vel við haldið.
Nýsköpun getur einnig skapað meiri verðmæti úr því sem fyrir er og aukið áfallaþol bænda. Þar getur sveitarfélagið stutt við með ráðgjöf, námskeiðum og auknum stuðningi við þróun nýrra verkefna. A-listinn vill meðal annars efla hlutverk byggðarþróunarfulltrúa til að styðja betur við frumkvæði og atvinnusköpun í sveitarfélaginu.
A-listinn vill líka standa vörð um það skipulag sem er nauðsynlegt fyrir landbúnað. Landnotkun og framtíðarsýn sveitarfélagsins skipta þar miklu máli.
Þá er spennandi að horfa til þess hvernig samfélagið sjálft getur stutt betur við landbúnaðinn. Í sveitarfélaginu eru hátt í 3.500 frístundahús og þúsundir gesta dvelja hér yfir sumarið. Margir þeirra hefðu án efa áhuga á að heimsækja bæi, versla beint við bændur eða sækja bændamarkaði. Það er þó mikilvægt að slík uppbygging verði unnin í samstarfi við bændur sjálfa og því viljum við stofna landbúnaðarnefnd sem vettvang samráðs og samstarfs.
A-listinn telur tækifærin innan landbúnaðar í Grímsnes- og Grafningshreppi vera gríðarleg. Með því að byggja á þeim sterka grunni sem fyrir er, styðja við nýsköpun og tryggja öfluga innviði getum við skapað skilyrði fyrir öflugan og fjölbreyttan landbúnað til framtíðar. Við viljum standa með bændum, efla atvinnulíf í sveitarfélaginu og stuðla að lifandi byggð þar sem fólk sér framtíðarmöguleika í sveitinni.
Bergur Guðmundsson
Skipar 3. sæti A-listans í Grímsnes- og Grafningshreppi
Ragnheiður Eggertsdóttir
Skipar 4. sæti A-listans í Grímsnes- og Grafningshreppi