Þorlákshöfn hefur vaxið hratt á undanförnum árum. Íbúum hefur fjölgað, ný hverfi risið og sífellt fleiri velja að búa hér. En með þessari þróun fylgir spurning sem við verðum að horfast í augu við: erum við að byggja upp öflugt atvinnusamfélag, eða erum við að verða svefnbær?
Í dag sækir stór hluti íbúa vinnu sína út fyrir sveitarfélagið. Það er skiljanlegt í ljósi nálægðar við höfuðborgarsvæðið. En það er ekki framtíðarsýn sem við eigum að sætta okkur við. Samfélag þar sem stór hluti íbúa þarf að leita atvinnu utan sveitarfélagsins missir af mikilvægum tækifærum til að byggja upp sterkari atvinnugrunn, efla samfélagið og styrkja lífsgæði íbúa.
Við viljum gera betur.
Ölfus hefur sett sér atvinnustefnu fyrir árin 2025–2030. Hún er mikilvægt skref og þar er að finna sýn um fjölbreytt atvinnulíf, uppbyggingu hafnarsvæðisins, græna iðngarða og aukna nýsköpun. Við viljum taka þessa stefnu upp og klára með miklu meiri aðkomu íbúa þar sem við teljum að samráð hafi ekki verið nægjanlegt við gerð atvinnustefnunnar. En það er ekki nóg að setja bara stefnu á blað, lykilatriðið er hvernig henni er fylgt eftir og það ætlum við að gera með markvissri og raunhæfri aðgerðaráætlun.
Stefnan er að mörgu leyti almenn og skortir skýrari forgangsröðun og mælanleg markmið um hvernig fjölga eigi störfum innan sveitarfélagsins. Það þarf að útfæra hana betur, forgangsraða verkefnum og tengja hana skýrt við daglega ákvarðanatöku sveitarfélagsins. Annars er hætta á að góð áform verði aldrei að veruleika.
Við viljum að atvinnustefnan verði meira en bara skjal í skúffu. Hún þarf að nýtast í raunverulegri ákvarðanatöku og vera skýrari þegar kemur að forgangsröðun og framtíðarsýn atvinnulífs í sveitarfélaginu.
Þorlákshöfn hefur sterka stöðu þegar kemur að atvinnuuppbyggingu og þar skiptir hafnarsvæðið miklu máli. Það er einn mikilvægasti innviður sveitarfélagsins og þar liggja mikil tækifæri til framtíðar. Við teljum mikilvægt að standa vörð um hafnarsvæðið sem atvinnusvæði og þróa það áfram með skýra sýn um atvinnu og verðmætasköpun. Þá skiptir máli að byggja ekki íbúabyggð nær hafnarsvæðinu en nú er, það mun skapa árekstra í framtíðinni því umsvif hafnarinnar munu vaxa og eiga að vaxa. Það myndi engum detta í hug að byggja íbúðahverfi ofan í Sundahöfn. Samfylkingin og félagar ætla að koma í veg fyrir að þéttingastefna Sjálfstæðisflokksins gangi eftir við hafnarsvæðið.
Við ætlum ekki að vaða áfram stefnulaust
Við þurfum markvissari stefnu og skýrari fókus um hvernig við ætlum að skapa fleiri störf innan sveitarfélagsins og styrkja atvinnulífið til framtíðar.
Við viljum efla samstarf við atvinnulífið, hlusta betur á fyrirtæki og skapa samkeppnishæf skilyrði til reksturs. Með því að lækka álögur á atvinnuhúsnæði og bæta rekstrarumhverfi getum við laðað að ný fyrirtæki og styrkt þau sem fyrir eru. Það teljum við okkur geta gert þegar ríkisstjórn Kristrúnar Frostadóttur afnemur undanþágur orkumannvirkja frá fasteignaskatti líkt og til stendur. Með þeirri breytingu munu orkumannvirki greiða fasteignaskatt af öllum sínum mannvirkjum, líkt og annað atvinnuhúsnæði, en verða jafnframt sett í sérstakan fasteignaskattsflokk. Við ætlum að nýta nýjar tekjur af orkumannvirkjum meðal annars til að lækka fasteignaskatthlutfall á atvinnuhúsnæði. Sterkt atvinnulíf þýðir fleiri störf, meiri þjónustu og betri lífsgæði fyrir íbúa. En uppbygging snýst ekki aðeins um magn heldur líka gæði.
Við leggjum áherslu á að atvinnuuppbygging sé í sátt við samfélagið. Umræður um stór verkefni á borð við Heidelberg og Carbfix hafa sýnt að íbúar vilja skýrar forsendur, gagnsæi og ábyrgð. Við viljum nálgast slík mál með faglegum hætti og tryggja að ákvarðanir taki mið af langtímahagsmunum íbúa og umhverfis.
Á íbúafundi okkar í Þorlákshöfn í gær var mikið og frjótt samtal sem sýndi vel af hverju við viljum leggja áherslu á reglulega íbúafundi og öflugt samtal. Kjörnir fulltrúar vita ekki allt best. Það er kraftur í samfélaginu sem við viljum virkja með öflugu samtali við íbúa og atvinnulíf. Í gær fæddist til dæmis hugmynd sem við sjáum fyrir okkur að setja í framkvæmd ef við fáum til þess umboð. Hún gengur út á að auka fjölbreytni í atvinnulífinu sem á sama tíma eykur þjónustu við íbúa. Sveitarfélagið getur sett í gang markaðsherferð sem gengur út á að auglýsa að hér séu tækifæri fyrir bakara, hárgreiðslufólk og annað fólk sem vill koma af stað rekstri sem bætir þjónustu við íbúa. Nóg er af húsnæði, frábærir skólar og samfélagið gott.
Markmiðið er skýrt.
Við viljum sveitarfélag þar sem fólk hefur raunverulegt val um að búa og starfa í sínu nærumhverfi. Þar sem fjölbreytt störf eru í boði, fyrirtæki dafna og tekjur sveitarfélagsins nýtast til að styrkja þjónustu og innviði.
Þorlákshöfn á ekki að vera svefnbær.
Hún á að vera lifandi samfélag sem skapar eigin tækifæri með skýrri stefnu, markvissri framkvæmd og velferð íbúa í fyrirrúmi.
Sigurður Freyr Vestmann Sigurvinsson
Skipar 5. sæti á lista Samfylkingar og félaga í Ölfusi