Ný viðamikil rannsókn á ánægja íbúa með þjónustu sveitarfélaga sýnir m.a. að ánægjan er minni í fjölkjarna sveitarfélögum. Samkvæmt rannsókninni virðist það vera mikil áskorun að veita góða þjónustu í fjölkjarnasveitarfélögum. Fjöldi þéttbýliskjarna hefur tilhneygingu til þess að auka flækjustig í veitingu þjónustu sem hugsanlega grefur undan ánægju íbúa með þjónustuna.
Vandaðri ákvarðanataka með hverfisráðum
Niðurstaða rannsóknarinnar er kjörnum fulltrúum áminning um að leggja harðar að sér til þess að auka ánægju íbúa. Í fjölkjarna sveitarfélögum er nauðsynlegt að eiga virkt samtal við íbúa í gegnum fastan formlegan vettvang eins og hverfisráð eða heimastjórnir. Í fjölkjarna sveitarfélögum er í raun algert lykilatriði að vera með virk hverfaráð. Hverfisráð er nauðsynleg rödd íbúa í nærsamfélaginu sem getur stutt við sveitastjórnir svo vanda megi betur ákvarðanatöku um þau málefni sem snerta samfélögin. Það er sérlega mikilvægt að fá fram sjónarmið þeirra sem þekkja söguna, eru með innsýn inn í staðarmenninguna og vita hvar skóinn kreppir í nærsamfélaginu. Við það að nýta ekki þessa þessa þekkingu og innsýn tapar sveitarfélagið í raun mikilvægum upplýsingum við ákvarðanatöku sem getur hreinlega leitt til þess að fjármunum er sóað. Það er í raun galið að nýta ekki þær dýrmætu bjargir sem sem felast í hverfaráðum eða heimastjórnum.
Kosningaloforð D- og Á-lista um hverfaráð
Hverfaráð hafa ekki verið starfandi í Svf. Árborg allt kjörtímabilið þrátt fyrir að eitt af kosningaloforðum D-lista fyrir síðustu kosningar hafi verið „efling hverfisráða“. Í grein sem oddviti Á-lista skrifaði fyrir síðustu kosningar kom m.a. fram að Á-listinn leggði til að kosið yrði með beinum og lýðræðislegum hætti í hverfaráð allra byggðakjarna og að þau fengju skýrar fjár- og valdheimildir og að þá gæti nærsamfélagið tekið hluta valdsins í sínar hendur.
Ekkert hafði heyrst af þessu kosningaloforði fyrr en undirrituð benti á fundargerð sem kom frá Félagi eldri borgara á Eyrarbakka og var á dagskrá fundar öldungaráðs Árborgar þann 29. september sl. Í fundargerð félags eldri borgara á Eyrarbakka var fjöldi góðra ábendinga um þarfar úrbætur á Eyrarbakka, ábendingar sem studdar voru bæði af Slysavarnarfélaginu Björg ásamt stjórn foreldrafélags BES, en bæði félögin rituðu stuðningsbréf við ábendingar og tillögur félags eldri borgara.
Á fundi bæjarráðs þar sem fundargerð Öldungaráðs með umræddu bréfi var tekin til umfjöllunar, benti undirrituð á að ábendingum bréfritara hafði ekki verið vísað áfram til frekari skoðunar og afgreiðslu á mannvirkja- og umhverfissvið eins og bar að gera, heldur eingöngu lagt fram til kynningar án nokkurrar eftirfylgni. Eftir ábendinguna var erindinu vísað til úrvinnslu á mannvirkja- og umhverfissviðs. Á fundi bæjarráðs benti undirrituð einnig á þá staðreynd í bókun að meirihluti D- og Á-lista hefði ekkert gert allt kjörtímabilið til þess að koma hverfaráðum í virkni á ný. Við þetta virtist meirihlutinn vakna upp við verulega vondan draum og vinna hófst við að endurskoða reglur um hverfisráðin sem lauk fyrir skemmstu. Ekkert hefur þó enn bólað á hverfisráðunum.
Vanvirðing við íbúa
Það er ómetanlegt og þakkarvert að íbúar hafi áhuga og metnað til að bæta nærumhverfi sitt og leggi á sig að koma ábendingum til bæjaryfirvalda þrátt fyrir skort á formlegum vettvangi fyrir sjálfsagt íbúalýðræði. Það er vanvirðing við íbúa í fjölkjarna sveitarfélagi að ekki skuli hafa verið skipað í hverfaráð á þessu kjörtímabili þar sem einmitt er formlegur vettvangur fyrir m.a. mál eins og komu fram í umræddu erindi frá félögunum á Eyrarbakka.
Í umræðunni um hverfisráðin á bæjarstjórnarfundi heyrðust fulltrúar meirihluta tala um að hluti af því að hverfisráðin hefðu ekki verið starfandi hefði verið nauðsynlegur sparnaður. Rétt er að benda á að kostnaður við þau á þessu kjörtímabili, ef starfsemi þeirra hefði verið eðlileg, hefði ekki verið nema brot af þeirri hækkun sem formaður bæjarráðs skammtaði sér þegar hann fékk ekki að verða bæjarstjóri. Kostnaður sveitarfélagsins vegna launahækkunar formanns bæjarráðs er alls 20 milljónir á kjörtímabilinu en kostnaður við hverfisráðin hefði orðið 7 milljónir á kjörtímabilinu.
Arna Ír Gunnarsdóttir
Bæjarfulltrúi S-lista