Í Grímsnes- og Grafningshreppi eru tveir listar í framboði, A-listi og Ö-listi. Það er í sjálfu sér kostur. Hér er engin þoka, engin ringulreið og engin óskýr millileið. Kjósendur standa frammi fyrir skýru vali milli tveggja meirihluta og tveggja ólíkra leiða fyrir sveitarfélagið.
Það er raunar táknrænt að bókstafir listanna, A og Ö, skuli standa hvor á sínum enda stafrófsins, því þegar á hólminn er komið er bilið á milli þessara tveggja framboða ekki lítið. Það er djúpt og grundvallandi.
Í kosningabaráttu má lofa öllu fögru. Fólk þekkir það. Kjósendur vita að loforð hafa oft tilhneigingu til að gufa upp þegar kemur að meirihlutaviðræðum, málamiðlunum og pólitískum hrossakaupum. En hér er staðan önnur. Hér geta kjósendur kosið hreinan meirihluta. Það er lúxus sem ekki er sjálfgefinn. Þá skiptir máli að spyrja: Hvort framboðið er líklegra til að standa við orð sín?
Svarið blasir við.
Það hefur vakið athygli margra í þessum kosningum að meiri- og minnihluti sveitarstjórnar undanfarin fjögur ár hafa nú tekið höndum saman og stillt sér upp á sama lista, A-listanum. Það eitt og sér ætti að fá fólk til að staldra við. Þegar þeir sem áttu að veita hvor öðrum aðhald enda saman í einu kosningabandalagi þá vaknar eðlileg spurning: Var ágreiningurinn aldrei raunverulegur, var hann aðeins sýndarmennska?
Er þetta ekki einmitt það sem fólk er orðið þreytt á í stjórnmálum? Að sömu aðilarnir, sem sátu hvor sínum megin borðsins, sameinist svo þegar hentar til að verja sama kerfið, sömu völdin og sama verklagið? Margir myndu kalla það samtryggingu. Aðrir kalla það einfaldlega gamaldags pólitík.
Fjögur ár eru langur tími. Rangt val getur kostað sveitarfélagið stöðnun, óbreytt vinnubrögð og áframhald á stjórnarháttum sem margir telja að þurfi að endurskoða frá grunni.
Þess vegna eru þessar kosningar svo mikilvægar. Það er mikilvægt að næstu 4 árin verði stjórnað af réttsýni og sanngirni, þar sem þjónustulund er í fyrirrúmi.
Valið er einfalt: Viltu sömu áherslur, sömu vinnubrögð og í raun sömu stjórn næstu fjögur árin? Eða viltu nýja sýn, nýjan kraft og Betri sveit – fyrir okkur öll?
Ö-listinn stendur fyrir öll. Ekki suma. Ekki fáa. Heldur alla.
Ö-listinn er valkostur þeirra sem vilja breytingar, sanngirni og stjórn sem vinnur fyrir allt sveitarfélagið.
Heimir Karlsson
Skipar 7. sætið á Ö–listanum í Grímsnes- og Grafningshreppi