Á laugardaginn 16. maí göngum við til kosninga og kjósum fólk sem við treystum til að fara með umboð okkar næstu fjögur árin hér í Sveitarfélaginu Árborg.
Ég hef verið bæjarfulltrúi í Árborg í 14 ár og hefur það verið mér sannur heiður að fá að þjóna íbúum sveitarfélagsins þessi ár og er ég tilbúinn að leggja allt mitt af mörkum til þess að gera okkar samfélag betra.
Ég hef á mínum bæjarstjórnarárum sinnt menningarmálum meðal annars og við í menningarnefnd höfum staðið fyrir ótal mörgum viðburðum og var það því einkar ánægjulegt á dögunum þegar við settum 13 viðburði á Youtube rás sveitarfélagsins sem er öllum aðgengileg. Þetta voru meðal annars Dönsku mjólkurfræðingarnir, Steina spil kvöldið, Byggðarhornsfjör, Sögur af Bakkanum, Málþing á Stokkseyri, KÁ kvöld og margt fleira. Í stuttri grein kýs ég að nefna þetta en gæti þó nefnt að verkefni okkar á næsta kjörtímabili er að skila til baka til íbúa og fyrirtækja hækkuðum álögum sem við af illri nauðsyn lögðum á vegna slæmrar fjárhagsstöðu sveitarfélagsins.
Ég mun áfram berjast fyrir málefnum eldra fólks í okkar samfélagi, framgangi aðstöðusköpunar fyrir blómlega menningu í sveitarfélaginu. Svo eru krefjandi verkefni í að bæta aðstöðu fyrir íþrótta- og frístundastarf í okkar öfluga samfélagi auk þess að halda vel utan um fjármálin sem er undirstaða þess að við höldum okkar sterku stöðu.
Ég vil hvetja ykkur kæru samborgarar til þess að kynna ykkur vel stefnur og strauma og þá veit ég að þið munuð finna samhljóm með okkur á D listanum. Ég gaf kost á mér í baráttusæti listans og samfélagið okkar er mín ástríða, því heiti ég á ykkur að hjálpa mér yfir þröskuldinn á laugardaginn með því að merkja X við D.
Kjartan Björnsson
Forseti bæjarstjórnar og 6. maður á D-listanum í Árborg