Það skiptir máli hverjir sitja við stjórnvölinn í bæjarstjórn. Reynslan er þar lykilatriði. Hún skapar festu, yfirsýn og betri ákvarðanir sem nýtast samfélaginu til lengri tíma. Þegar fólk fær að starfa lengur en eitt kjörtímabil byggist upp þekking sem skiptir sköpum, þekking á ferlum, forgangsröðun og því hvað raunverulega skilar árangri.
Sem nýliði í þessum málum segi ég það hreint út: ég væri ekki jafn róleg ef allur hópurinn væri jafn óreyndur og ég. Þess vegna er ég þakklát fyrir að fá að starfa með reynslumiklu og traustu fólki sem skiptir máli þegar taka þarf stórar ákvarðanir til dæmis um skipulag nýrra íbúðahverfa, uppbyggingu skóla eða þróun samgangna. Þetta eru verkefni sem krefjast undirbúnings, skýrra markmiða og ábyrgðar.
Við eigum ekki að vera að skipta stöðugt um stefnu eða hlaupa í skyndilausnir sem líta vel út í dag en standast ekki tímans tönn. Við þurfum stöðugleika og skýra sýn.
Við viljum byggja upp sterka innviði, halda áfram að lækka gjöld þar sem svigrúm er til, styðja við fjölskyldur og atvinnulíf og setja fram raunhæfar lausnir sem standast.
Ég kem inn með ferska sýn og vilja til að læra en líka ákveðni til að leggja mitt af mörkum. Þegar reynsla og ný hugsun vinna saman verða til bestu niðurstöðurnar. Það er sú leið sem ég vil fara.
Linda Björk Hilmarsdóttir
Skipar 3. sæti á D-listanum í Árborg