Hversu auðvelt er fyrir alla íbúa Árborgar að finna upplýsingar um rétt sinn eða þá þjónustu sem stendur til boða?
Ein af grunnstoðum góðrar þjónustu sveitarfélaga er aðgengi að skýrum, áreiðanlegum og uppfærðum upplýsingum. Í ört stækkandi sveitarfélagi eins og Árborg er sífellt meiri þörf fyrir aðgengilegar upplýsingar um réttindi, þjónustuúrræði og það sem stendur íbúum til boða.
Upplýsingar þurfa að vera settar fram á einfaldan og aðgengilegan hátt og á auðlesnu máli til að mæta þörfum ólíkra hópa sem búa í sveitarfélaginu. Þetta á sérstaklega við um eldra fólk, fatlað fólk, fólk með annað móðurmál en íslensku og aðra einstaklinga sem standa frammi fyrir flóknum félagslegum aðstæðum.
Raunin er þó sú að fyrir marga íbúa er leit að slíkum upplýsingum flókin og torskilin. Foreldri sem leitar stuðnings fyrir barnið sitt, eldri borgari sem þarf upplýsingar um þjónustu eða nýr íbúi sem skilur ekki íslensku – allir eiga rétt á að finna svör án þess að þurfa að leita í flóknu kerfi eða bíða eftir svörum í síma eða tölvupósti. Þetta er ekki spurning um þægindi heldur jafnræði.
Leiðir til úrbóta
Það þarf ekki að finna upp hjólið. Fjöldi sveitarfélaga hefur þegar sýnt fram á hvernig hægt er að gera þetta vel, til dæmis Reykjavíkurborg, Kópavogsbær og Akureyrarbær, með skýrum, og notendavænum vefjum þar sem einfalt er að finna upplýsingar og þjónustan er sett í forgrunn.
Árborg ætti að setja sér sama markmið – og gera enn betur. Hanna þarf heimasíðu sveitarfélagsins með stafrænt aðgengi að leiðarljósi og taka mið af ólíkum þörfum notenda. Þar má nefna stuðning við skjálesara og talgervla, möguleika á stækkun texta og önnur verkfæri sem auðvelda lestur. Þá skiptir notkun myndræns efnis og ekki síst auðlesið mál miklu máli.
Umbætur á heimasíðu sveitarfélagsins hvað stafrænt aðgengi varðar eru aðkallandi og ættu að vera forgangsmál sveitarstjórnar. Sveitarstjórn sem leggur áherslu á aðgengi að upplýsingum sendir skýr skilaboð um að allir íbúar sveitarfélagsins búi við jafnræði.
Með því að setja íbúa sveitarfélagsins í forgrunn og tryggja öllum jafnan aðgang að upplýsingum styrkjum við samfélagið í heild og leggjum grunn að betri og réttlátari þjónustu í Árborg – óháð fötlun, tungumáli eða félagslegum aðstæðum.
Ávinningur
Leit að upplýsingum um grunnþjónustu sveitarfélagsins, svo sem félagslega þjónustu, skólamál, húsnæðisúrræði á heimasíðu sveitarfélagsins er erfið og ekki er hugað að stafrænu aðgengi. Það krefst þess að íbúar hafi samband við starfsmenn sveitarfélagsins símleiðis eða með tölvupósti. Það veldur óþarfa álagi bæði á íbúa og starfsfólk.
Það er því ekki eingöngu hagur íbúanna að upplýsingar séu aðgengilegar, heldur dregur það jafnframt úr álagi á starfsfólk sem annars þarf að svara fyrirspurnum sem ættu að vera aðgengilegar öllum.
Bætt aðgengi að upplýsingum er ekki aðeins tæknilegt verkefni – það er lýðræðislegt réttlætismál. Með því að setja íbúa sveitarfélagsins í forgrunn og tryggja öllum jafnan aðgang að upplýsingum styrkjum við samfélagið í heild og leggjum grunn að betri og réttlátari þjónustu í Árborg – óháð fötlun, tungumáli eða félagslegum aðstæðum.
Eva Gunnarsdóttir
Skjalastjóri
Skipar 8. sæti Samfylkingarinnar og óháðra í Árborg