Sveitarfélagið Árborg er ört vaxandi samfélag sem hefur staðið frammi fyrir verulegum áskorunum á undanförnum árum. Selfossveitur sjá sveitarfélaginu fyrir heitu vatni og hafa sannarlega fundið fyrir þessum vexti. Veitan hefur þurft að stækka í takt við aukna eftirspurn og því var aukinn kraftur settur í rannsóknir og leit að heitu vatni strax í upphafi kjörtímabilsins árið 2022.
Veitan var við þolmörk
Líkt og komið hefur fram var hitaveitan komin að þolmörkum veturinn 2022. Samþykkt byggingarmagn var þá orðið meira en afhendingargeta Selfossveitna og þurfti tímabundið að takmarka útgáfu byggingarleyfa. Langt kuldakast frá lokum árs 2022 fram
í byrjun árs 2023 reyndi verulega á kerfið. Sundlaugar voru lokaðar í allt að fimm vikur og hitastig lækkað í skóla- og íþróttamannvirkjum yfir jólaleyfið til að draga úr álagi.
Í kjölfarið var sótt umfram orka sem var þá ónýtt, á vinnslusvæðið okkar við Ósabotna. Þá hefur einnig fundist heitt vatn á þremur stöðum innan bæjarmarka Selfoss. Ein hola hefur þegar verið tekin í notkun og jók hún afkastagetu veitunnar um 10%. Virkjun á annarri holu er á lokastigi, en tafir hafa orðið vegna afhendingar á búnaði.
Staðan í dag
Síðustu mánuðir hafa verið veðurfarslega hagstæðir, með mildum vetri og minna álagi á hitaveituna. Afkastageta hennar hefur haldist stöðug.
Hins vegar hefur úrkoma verið óvenju lítil, sem hefur haft áhrif á grunnvatnsstöðu. Þetta hefur valdið hraðari niðurdrætti í vinnsluholum Selfossveitna en veitan á að venjast, með þeim afleiðingum að minna magn vatns berst í miðlunartankinn. Um þessar mundir er það magn um 10–15% minna en eðlilegt getur talist úr nær öllum vinnsluholum.
Þrátt fyrir þetta hefur tekist að tryggja þjónustu við notendur, þó ljóst sé að svigrúm í kerfinu hefur tímabundið minnkað. Á tímabili þurfti þó að skerða þjónustu við sundlaugar sveitarfélagsins til að tryggja afhendingu til heimila og fyrirtækja.
Áfram í sókn eftir heitu vatni
Áfram verður unnið að því að virkja þær holur þar sem vatn hefur fundist í vinnanlegu magni og markvisst er haldið áfram jarðhitaleit og uppbyggingu. Gengið hefur verið frá samningum um hitaveituréttindi á nýjum svæðum og rannsóknir eru hafnar. Nú stendur m.a. yfir jarðhitaleit í landi Hallanda í Flóa ásamt stórri rannsóknarholu fyrir neðan sláturhús SS á Selfossi og er niðurstöðu að vænta á næstu dögum.
Þótt tímabundinn niðurdráttur hafi orðið í vinnsluholum vegna þurrkatíðar er staðan engu að síður betri en hún hefur verið. Við höfum styrkt hitaveituna, aukið afkastagetu og tryggt að hún standi betur undir vexti samfélagsins. Árborg er því í góðri stöðu til að mæta framtíðinni.
Sveinn Ægir Birgisson
Formaður bæjarráðs og eigna- og veitunefndar Sveitarfélagsins Árborgar