Við búum í einu af fegurstu og gjöfulasta sveitarfélagi landsins, þar sem náttúran, samfélagið og staðsetningin skapa einstök tækifæri til uppbyggingar. Nú er tími til að horfa fram á veginn, vera framsýn og ræða hvernig við nýtum þessi tækifæri af skynsemi, metnaði og samheldni.
Ég er í framboði fyrir Þ-listann í Bláskógabyggð, í 4. sæti, vegna þess að ég tel að við getum gert enn betur fyrir samfélagið okkar. Sýn mín er einföld: að byggja upp sterkt, lifandi samfélag þar sem fólk getur sest að, unnið, alið upp börn, elst og notið lífsins í öruggu og rólegu umhverfi.
Eitt stærsta sóknarfærið felst í því að bjóða upp á fleiri íbúðalóðir til úthlutunar. Með því sköpum við raunverleg tækifæri fyrir ungt fólk, barnafjölskyldur og alla þá sem vilja byggja sér framtíð í Bláskógabyggð. Staðsetningin okkar er einstök, stutt á Selfoss og höfuðborgarsvæðisins, en samt njótum við kyrrðar, nálægðar við náttúruna og sterkra samfélagstengsla.
Samhliða íbúðauppbyggingu þurfum við að hugsa atvinnulífið til framtíðar. Hér eru tækifæri til að bjóða fyrirtækjum lóðir til uppbyggingar og skapa fjölbreyttari störf innan sveitarfélagsins. Með markvissri stefnu getum við laðað að fyrirtæki sem falla vel að okkar samfélagi og styrkt þannig atvinnuöryggi og þjónustu.
Þjónusta er lykilatriði í velferð íbúanna. Ég tel það raunhæft og mikilvægt markmið að fá til okkar meiri grunnþjónustu, svo sem dvalarheimili fyrir aldraða, apótek og lágvöruverslun. Slík þjónusta sparar fólki tíma, eykur lífsgæði og gerir Bláskógabyggð enn álitlegri kost fyrir nýja íbúa. Þetta snýst ekki aðeins um þægindi, heldur um jafnræði og sjálfbærni í daglegu lífi. Eitt stærsta velferðarmálið sem við stöndum frammi fyrir er skortur á dvalarheimili fyrir eldri borgara í Bláskógabyggð. Í dag neyðumst við til að senda íbúa okkar í önnur sveitarfélög þegar þeir þurfa á slíkri þjónustu að halda. Það er staða sem hvorki er mannúðleg né æskileg. Eldra fólk á ekki að þurfa að flytja frá fjölskyldu, vinum og heimabyggð til að fá þá umönnun og þjónustu sem það á rétt á, það væri galið gott að fá þessa þjónustu í heimabyggð. Dvalarheimili í Bláskógabyggð væri ekki aðeins þjónustuúrræði, heldur tákn um virðingu, samfélagslega ábyrgð og langtímahugsun.
Nýr veruleiki vinnumarkaðarins opnar einnig spennandi möguleika. Fjarvinna er orðin hluti af daglegu lífi margra, en fáir vilja vinna einir heima alla daga. Hér sé ég mikil sóknarfæri í að útbúa sameiginleg rými þar sem fólk getur unnið fjarvinnu, hitt annað fólk, drukkið kaffi og byggt upp tengsl. Slík rými styrkja samfélagið, draga úr einangrun og skapa líf í kjarna sveitarfélagsins.
Framtíð Bláskógabyggðar byggist á samvinnu, skýrri sýn og hugrekki til að nýta þau tækifæri sem okkur bjóðast. Ég vil leggja mitt af mörkum til þess verkefnis og vinna að uppbyggingu samfélags sem við getum verið stolt af – nú og til framtíðar.
Hildur Hálfdanardóttir
Skipar 4. sætið á Þ-listanum í Bláskógabyggð