Í kosningabaráttu keppast framboð við að kasta fram loforðum. Sjaldnar er rætt um hvað eigi ekki að gera, en einmitt þar birtist ábyrgðin, í því að setja sér mörk og halda sig við þau.
Við í D-listanum veljum að setja ekki fram loforð sem ætlað er að kaupa atkvæði bæjarbúa. Í staðinn setjum við fram skýra stefnu um hvernig við ætlum að vinna fyrir bæjarbúa, hvernig ákvarðanir verða teknar og hvaða leiðarljós og gildi munu móta þá ákvörðunartöku.
Við ætlum að taka ákvarðanir með hag íbúa að leiðarljósi. Við munum kalla hagaðila að borðinu, hlusta á ólík sjónarmið og byggja ákvarðanir á raunverulegri þekkingu og reynslu þeirra sem málin varða.
Við viljum:
- leggja áherslu á fagleg vinnubrögð og vandaðan undirbúning.
- tryggja að ákvarðanir séu teknar á traustum og gagnsæjum grunni.
- nýta samtal og samráð sem lykilverkfæri í allri stefnumótun.
- horfa til langtímahagsmuna samfélagsins fremur en skammtímalausna.
- vernda bæjarbrag með skýrri og skynsamlegri uppbyggingu.
- standa vörð um ábyrg fjármál með skýrri forgangsröðun.
Við ætlum ekki:
- að kasta fram óraunhæfum gylliboðum.
- að fara í uppbyggingu innviða sem þjóna ekki best hagsmunum þeirra sem eiga að nýta þá.
- að horfa framhjá nauðsynlegum þáttum eins og fullnægjandi bílastæðum og góðu aðgengi.
- að fara í stórar breytingar á skipuriti og stjórnsýslu bæjarins án þess að kynna þær skýrt fyrir bæjarbúum.
- að leggja óþarfa fjárhagslegar byrðar á íbúa Hveragerðis með óhagkvæmum fjárfestingum.
Við viljum jafnframt vera skýr um þau leiðarljós og gildi sem liggja að baki okkar vinnu. Fyrir okkur skipta heiðarleiki, ábyrgð og fagmennska ekki aðeins máli í orði heldur í verki og í hverri ákvörðun.
Með því að segja skýrt hvað við ætlum ekki að gera undirstrikum við hvað við stöndum fyrir. Við trúum því að bæjarbúar eigi skilið hreinskilni, ábyrgð og fagleg vinnubrögð.
Það er sú nálgun sem við bjóðum upp á, af ábyrgð fyrir betri lífsgæði.
Ingimar Guðmundsson
1.sæti D-listans í Hveragerði
María Rún Þorsteinsdóttir
2. sæti D-listans í Hveragerði