Kæru íbúar Árborgar.
Ég heiti Linda Björk Hilmarsdóttir og ég býð mig fram til bæjarstjórnar fyrir D-listann í Árborg.
Þessi ákvörðun er tekin af yfirvegun og djúpri ábyrgðartilfinningu, og byggir á einlægum vilja til að leggja mitt af mörkum vegna þess að ég tel að við getum og eigum að taka næsta skref í þróun samfélagsins okkar.
Ég hef um nokkurt skeið unnið að réttindabaráttu fatlaðra barna, meðal annars út frá eigin reynslu sem foreldri barns með hreyfihömlun og aðrar raskanir. Sú reynsla hefur kennt mér hvað skiptir máli þegar kemur að þjónustu og stuðningi og hversu mikilvægt það er að kerfið sé bæði skýrt og aðgengilegt þegar mest á reynir.
Ég hef einnig starfað við eigin rekstur og kynnst því af eigin raun að árangur krefst ábyrgðar, úthalds og skýrra ákvarðana. Í dag vinn ég samhliða rekstrinum við að efla fólk og styðja til virka þátttöku í atvinnulífinu í starfsendurhæfingu sé ég með eigin augum hvað gerist þegar fólk fær tækifæri til að vaxa og er metið þeim verðleikum sem við öll búum yfir.
Ég kem með reynslu af ólíkum sviðum en á líka margt eftir ólært og lít ég á það sem styrkleika. Ég treysti mér til að hlusta, framkvæma og taka leiðsögn. En umfram allt treysti ég mér til að standa með fólki og vinna að raunverulegum breytingum í þágu samfélagsins.
Ég vil vera hluti af bæjarstjórn sem:
– Byggir á því sem vel er gert
– Hikar ekki við að bæta það sem þarf
– Setur málefni fjölskyldna, farsæld barna og öflugt atvinnulíf í forgang
Ég býð mig fram fyrir D-listann vegna þess að ég trúi á ábyrg vinnubrögð, skynsemi og stöðuga framþróun. Ég vil leggja mitt af mörkum til að tryggja að Árborg haldi áfram að þróast í takt við þarfir íbúanna.
Árborg okkar allra – þar sem þú skiptir máli.
Linda Björk Hilmarsdóttir
Skipar 3. sæti D-listans í Árborg