Á 72. fundi bæjarstjórnar á yfirstandandi kjörtímabili var fyrsta mál á dagskrá ársreikningur Sveitarfélagsins Árborgar fyrir árið 2025, sem lagður var fram til fyrri umræðu. Undirritaður hvetur áhugasama til að kynna sér innihald hans við birtingu, enda kemur þar fram yfirlit yfir tekjur, afkomu, eignir og sjóðstreymi sveitarfélagsins auk ítarefnis.
Gegndarlausar skattheimtur
Í ársreikningnum birtast skýrt áherslur núverandi meirihluta Sjálfstæðismanna, þar sem gengið er fram með óhóflegri skattheimtu. Heildarskatttekjur sveitarfélagsins námu 13,1 milljarði kr., og því voru, að meðaltali, um 1,4 milljónir kr. sóttar í vasa hvers greiðenda á árinu.
Fasteignaskattur hækkar um 51,8% á milli ára
Fasteignaskattar á eignir einstaklinga og fyrirtækja námu um 2,3 milljörðum kr. árið 2025 og hafa hækkað verulega milli ára. Árið 2024 námu þessir sömu skattar um 1,5 milljörðum kr. sem þýðir hækkun upp á 800 milljónir kr. á milli ára. Þessi hækkun nemur um 51,8% þegar krónutöluhækkunin er reiknuð og er langt umfram það sem telja má hóflegt. Slík aukning er fordæmalaus í sveitarfélaginu og hefur haft bein áhrif á fasteignaeigendur, sem hafa fundið verulega fyrir þessari þróun.
Byggingarréttargjald aukaskattur á fasteignaeigendur
Á árinu innheimti sveitarfélagið um 370 milljónir kr. í byggingarréttargjöld, samanborið við um 57 milljónir árið áður. Ekki er ljóst með hvaða hætti meirihlutinn hefur gert ráðstafanir með að leggja gjaldið til hliðar í sjóð fyrir uppbyggingu skóla, leikskóla eða íþróttamannvirkja. Þessi gjaldtaka leggst að stórum hluta á kaupendur fasteigna og hefur jafnframt haft áhrif á hækkun fasteignamats, sem aftur hefur áhrif á útreikning fasteignagjalda. Þannig myndast vítahringur hækkandi gjalda.
Við í Framsókn höfum ekki samþykkt fjármálaáætlanir meirihlutans undanfarin ár vegna þessarar stefnu. Við höfum ítrekað bent á að fólksfjölgun og hækkandi meðaltekjur með fjölgun íbúa myndu bæta rekstrarstöðuna til lengri tíma. Við því var skellt skollaeyrum og áfram skyldi haldið því tilgangurinn helgaði meðalið.
Markmiðið virðist hafa verið að ná fram jákvæðri niðurstöðu í rekstri með aukinni skattheimtu svo tryggja mætti endurkjör. En spurningin sem eftir stendur er einföld: Var það þess virði?
Arnar Freyr Ólafsson
Bæjarfulltrúi Framsóknar í Árborg