Eitt af stefnumálum Samfylkingarinnar er að lögfesta leikskólastigið og rétt til leikskólavistar að loknu fæðingarorlofi í samstarfi ríkis og sveitarfélaga. Með því brúum við endanlega bilið fyrir foreldra og tryggjum börnum jafnan rétt til skólavistar á fyrsta skólastiginu. Við leggjum mikla áherslu á að létta barnafólki lífið, þau bera oft þyngstu byrðarnar, eru að koma sér upp heimili og börnunum í gegnum skóla, til dæmis með því að setja þak á leikskólagjöld og taka upp 100% systkinaafslátt.
Framtíðarlausn í stað plástra
Lögfestingu leiksólastigins þarf að fylgja að betur verði hlúð að faglega starfinu á leikskólunum, starfsaðstæðum kennara og annars starfsfólks. Með þessari breytingu fá leikskólarnir „loksins þann sess sem þeir eiga skilið og innspýtingu fjármagns með aðkomu ríkisins,“ einsog forsætisráðherra orðaði það svo vel í ræði sinni í Iðnó á 1. maí.
Samfélag jafnra tækfæra á að setja markið hátt og hugsa stórt þegar kemur að menntun og umönnun. Þar jöfnum við leikinn óháð aðstæðum og efnahag. Tryggjum öllum sama rétt og sama aðgengi.
Á meðan boða andstæðingar okkar úreltar hugmyndir, plástra á sárin með hvötum fyrir konur til að vera heima og að leikskólum geti í sumum tilfellum ráðist af því hvort foreldrarnir vinni hjá stórfyrirtæki eða ekki, líkt og hægri flokkarnir í borginni boða núna.
Bætum kjör og aðstæður starfsfólks
Sjálf hef ég unnið á leikskóla og veit af eigin raun að það er bæði krefjandi starf og gefandi. Hinsvegar er það fullkomlega óásættanlegt að starfsfólki þeirra, faglærðu og ófaglærðu séu ekki tryggð mannsæmandi kjör og góðar vinnuaðstæður.
Átakið sem við jafnaðarfólk boðum í leikskólamálum snýr annarsvegar að því að lögfesta réttinn til leikskóla, setja þak á leikskólagjöld og taka upp 100% systkinaafslátt, og hinsvegar að bæta kjör og aðstæður starfsfólks leikskóla.
Á næsta kjörtímabili þarf að lækka kostnað barnafólks, tryggja aðgang að leikskólum frá 1 árs aldri og gera dvalartímann sveigjanlegri með meiri fyrirsjánleika. Þetta eru háleit og stór markmið sem nást ekki nema að við stöndum saman að þeim, setjum markið hátt og hugsum stórt. Þannig jöfnum við leikinn í samfélaginu.
Elísabet Björgvinsdóttir
4. sæti á lista Samfylkingarinnar og óháðra í Árborg