Eitt af hlutverkum sveitarfélaga er að sinna opinberri þjónustu við fyrirtæki sem ýmist hyggjast hefja starfsemi á svæðinu eða hafa hér starfsemi nú þegar. Ekki síst er mikilvægt að vinnubrögð embættismanna við afgreiðslu erinda og leyfisveitingar séu fumlaus og traustvekjandi.
Nýverið samþykktu bæjaryfirvöld samning um áframhaldandi uppbyggingu atvinnustarfsemi á lóðum við Austurveg 69 á Selfossi. Það er fyrirtækið Árfoss ehf. sem stendur að uppbyggingunni en fyrirtækið hefur unnið öflugt starf á undanförnum árum við endurbætur og uppbyggingu húsnæðis á lóðinni.
Þar er um að ræða dæmi um spennandi verkefni sem felst í samstarfi sveitarfélagsins við uppbyggingaraðila og verður ferlið einfaldara þegar framkvæmdir við gatnagerð og uppbyggingu húsnæðis er á hendi sama aðila. Slíkt eykur skilvirkni og í kjölfarið verðmætasköpun í samfélaginu.
Ætla má að framkvæmdir hefjist á tveimur lóðum strax á næstu mánuðum en fyrir er vissulega margháttuð atvinnuuppbygging þar í kring. Framkvæmdir sem bætast við uppbyggingu fjölda atvinnulóða sem hefur verið úthlutað á undanförnum mánuðum. Má þar nefna uppbygging undir fjölbreytta starfsemi á fimm lóðum í Víkurheiði, starfsemi bílaumboðsins Heklu og stækkun Eimskips á Selfossi ásamt lóð fyrir starfsemi Álkerfa á Eyrarbakka. Einnig eru rótgróin fyrirtæki á svæðinu, líkt og MS og SS að horfa til umfangsmikilla stækkunar á sinni starfsemi.
Með þessum verkefnum fylgja störf og tilheyrandi efling svæðisins og sveitarfélagsins sem treystir ennfrekar stöðu þess sem höfuðstaðar verslunar og þjónustu á Suðurlandi.
Við í framboði D-listans í Árborg höfum mikinn metnað til að halda áfram öflugri þjónustu við bæði þá sem búa hér og reka sín fyrirtæki. Mikilvægt er í því sambandi að opinberir fjármunir séu nýttir á réttan og hagkvæman hátt. Höldum áfram af ábyrgð fyrir Árborg okkar allra – þar sem þú skiptir máli.
Bragi Bjarnason
Bæjarstjóri og oddviti Sjálfstæðisflokksins í Árborg