Fjárhagsáætlun Hveragerðisbæjar fyrir árið 2026 var samþykkt samhljóða á fundi bæjarstjórnar 11. desember 2025. Reiknað er með að rekstrarniðurstaða samstæðu verði 500 m.kr. og að handbært fé frá rekstri verði í árslok 262 m.kr.
Í fjárhagsáætlun Hveragerðisbæjar er sérstök áhersla lögð á þjónustu við íbúa ásamt því að efla og styðja við lífsgæði í bænum eins og best verður á kosið. Sérstaklega er einblínt á barnafjölskyldur með öflugum menntastofnunum, gæðum í íþrótta- og frístundastarfi og fjölbreyttu atvinnulífi. Þá er heilsuefling allra íbúa í forgrunni ásamt blómstrandi menningu og ferðaþjónustu. Fram undan eru fjölmörg tækifæri og bjartir og spennandi tímar.
Stórsókn til framtíðar
Samkvæmt fjárhagsáætlun til næstu þriggja ára verður stórsókn í hinum ýmsu málaflokkum og ber þar hæst verklok á nýju gervigrasi, gatnagerð í nýjum hverfum, fráveitumálum og kaupum á félagslegu húsnæði.
Þá er einnig stórsókn í málefnum fjölskyldna en frístundastyrkur hefur hækkað um 92% á kjörtímabilinu og mun hækka úr 44.000 kr. í 50.000 kr. á árinu 2026. Eins hafa leikskólagjöld lækkað um tæp 70% á kjörtímabilinu og munu halda áfram að lækka haustið 2026. Á kjörtímabilinu hófust foreldragreiðslur og verða þær 129.000 kr. á barn frá 12 mánaða aldri og þar til það kemst inn á leikskóla eða til dagforeldris. Samtals er áætlað að foreldragreiðslur nemi 1,5 m.kr. á árinu 2026. Með þeim aðgerðum sem farið hefur verið í á kjörtímabilinu, og þar með talið fríum skólamáltíðum, eru nú um 432.000.- kr. minni kostnaður á barnafjölskyldur á ári, sem telja hjón með eitt barn á leikskóla og eitt barn í grunnskóla, en í upphafi kjörtímabils.
Tekjur og gjaldskrár
Álagningarhlutfall fasteignaskatts lækkar á árinu 2026, á íbúðarhúsnæði (A-flokk) lækkar hlutfallið úr 0,330% í 0,320%. Á kjörtímabilinu hefur álagningarhlutfall fasteignaskatts á íbúðarhúsnæði því lækkað um 23%. Álagningarhlutfall á atvinnuhúsnæði (C-flokk) lækkar úr 1,480% í 1,450%. Álagningarhlutfall útsvars verður hins vegar óbreytt frá fyrra ári í 14,97% sem og hlutfall á lóðarleigu. Gjaldskrár vatnsveitu og fráveitu eru óbreyttar árið 2026 en gjaldskrá sorphirðu hækkar um raunkostnað eftir stærð og tegund sorptunna. Samkvæmt áætlun frá Jöfnunarsjóði sveitarfélaga nemur úthlutun sjóðsins til Hveragerðisbæjar 1.834 m.kr. á árinu 2026. Almenn gjaldskrárhækkun þjónustutekna nemur 4%.
Fjárfestingar
Í ört stækkandi bæjarfélagi þurfa innviðir að halda í við fjölda bæjarbúa og því nauðsynlegt að ráðast í tilteknar framkvæmdir. Áætlaðar fjárfestingar til ársins 2029 felast að stærstum hluta í byggingu fjórða hluta grunnskólans, fyrsta áfanga nýs leikskóla í Kambalandi, uppbyggingu íþróttamannvirkja og veitnaframkvæmdum. Þá er stór áfangi að á tímabilinu er gert ráð fyrir að ráðast í framkvæmdir við þjónustumiðstöð eldri borgara. Kostnaður við fjárfestingar árið 2026 er áætlaður 926 m.kr., árið 2027 1.038 m.kr., árið 2028 er áætlað að kostnaður við fjárfestingar nemi 785 m.kr. og árið 2029 muni hann nema 223 m.kr.
Þakkir
Meirihluti bæjarstjórnar vill koma á framfæri einlægum þökkum til bæjarstjóra og skrifstofustjóra Hveragerðisbæjar fyrir óeigingjarna og umfangsmikla vinnu við gerð fyrirliggjandi fjárhagsáætlunar. Fjárhagsáætlanir einstakra deilda eru unnar í góðri samvinnu við forstöðumenn stofnana og er þeim jafnframt þakkað fyrir sitt góða framlag. Öðru starfsfólki Hveragerðisbæjar eru einnig færðar þakkir fyrir gott samstarf við fjárhagsáætlunargerðina.
Afrakstur kjörtímabils
Fjárhags – og fjármálaáætlun Hveragerðisbæjar fyrir árið 2026 og þriggja ára er afrakstur kjörtímabils framþróunar og uppbyggingar í bænum. Kröftug rekstrarafkoma, lækkun skatta, mikil innviðauppbygging, styrking fjárhags og lækkun skuldálags eru megin niðurstaða áætlunarinnar – íbúum til meiri gæða og aukinnar velferðar.
Fjárhagsáætlun Hveragerðisbæjar fyrir árið 2026 er skýr, björt og metnaðarfull framtíðarsýn fyrir bæ í blómlegum vexti.
Sandra Sigurðardóttir, forseti bæjarstjórnar og oddviti Okkar Hveragerðis
Halldór Benjamín Hreinsson, bæjarfulltrúi Framsóknar
Njörður Sigurðsson, bæjarfulltrúi Okkar Hveragerðis
Dagný Sif Sigurbjörnsdóttir, bæjarfulltrúi Okkar Hveragerðis
Jóhanna Ýr Jóhannsdóttir, formaður bæjarráðs og oddviti Framsóknar