Kæra Vegagerð,
Eins og öll vita sem hafa komið í Grímsnes- og Grafningshrepp er hvergi betra að búa eða verja lengri eða skemmri tíma í frístundahúsinu sínu. Það er ekki skrítið þar sem að hreppurinn er einstaklega vel staðsettur í öllu tilliti.
En til þess að komast til og frá þéttbýlinu á Borg eða Sólheimum eða bara úr sælunni í sveitinni þá þarf að vera hægt að keyra á góðum vegum.
Því miður er það ekki alltaf raunin. Sólheimavegurinn hefur ekki verið skilgreindur á réttan hátt þrátt fyrir að þar sé rúmlega 100 manna þéttbýliskjarni svo að vetrarþjónusta er takmörkuð þar. Einnig sjáum við að Biskupstungnabraut og Þingvallavegur eru langt frá því að fá þá þjónustu sem þeir þurfa miðað við notkun.
Það er því afar mikilvægt að Vegagerðin fari að sinna þessu af fullum krafti. Sérstaklega þegar búið er að leggja á landsbyggðina landsbyggðarskatt í formi veggjalda sem eðli málsins samkvæmt leggst þyngra á okkur sem þurfum að fara um langan veg til að sækja alla þjónustu.
Fyrsta skref væri að senda af stað bíla og mannskap til að laga holur í þessum þremur vegum strax á morgun. Það er ekki nóg að setja bara upp merkingar fyrir lægri hraða þó það sé auðvitað mikilvægt öryggisatriði.
Við í A-listanum ætlum að ganga í þessi verkefni á næsta kjörtímabili og munum ekki stoppa fyrr en þessi mál eru komin í mun betra horf.
Við munum einnig halda ótrauð áfram með uppbyggingu á hjólastígum meðfram helstu leiðum en sem betur fer er sveitarfélagið í góðu samtali við Vegagerðina um það nú þegar. Svo má ekki gleyma því að laga skilti og annan öryggisbúnað á þessum vegum, sérstaklega núna þegar veturinn er búinn og sumartraffíkin að aukast.
Kæra Vegagerð,
það er óhætt að taka frá tíma þann 18. maí því að þá munum við byrja fundarhöldin.
Guðmundur Finnbogason
Oddviti A-listans í Grímsnes- og Grafningshreppi