Sameiginlegt verkefni til framtíðar
Öruggar og góðar samgöngur eru ein af grunnforsendum þess að blómlegt samfélag fái að vaxa og dafna. Þetta er jafnframt það sem íbúar Flóahrepps nefna oftast í samtölum og vilja setja á oddinn á komandi árum. Í Flóahreppi hafa samgöngur áhrif á marga þætti daglegs lífs: akstur barna í skóla og frístundir, aðgengi að vinnu og þjónustu, rekstur fyrirtækja og val um búsetu. Þá skipta góðar og greiðar samgöngur einnig miklu máli fyrir öryggi vegfarenda og neyðarviðbragð innan sveitarfélagsins.
Fulltrúar Framfaralistans í Flóahreppi vilja leggja ríka áherslu á að samgöngumál séu unnin í nánu og uppbyggilegu samstarfi við Vegagerðina og ríkið, enda liggur ábyrgð á vegakerfinu hjá Vegagerðinni sem er ríkisstofnun og veghaldari skv. vegalögum.
Við gerum okkur fulla grein fyrir því að forgangsröðun framkvæmda og viðhalds er flókið verkefni sem tekur mið af heildarhagsmunum allra landsmanna, fjármagni og tæknilegum forsendum. En við viljum að sjónarmið íbúa dreifbýlis, þeirra sem reiða sig á daglegan akstur vegna atvinnu, skólasóknar og þjónustu, fái skýran og sterkan hljómgrunn.
Í Flóahreppi býr fólk yfir þekkingu á aðstæðum, veðri og umferð. Sú þekking er dýrmæt og mikilvægt er að hún nýtist sem best í samstarfi við Vegagerðina. Þess vegna viljum við vera virkur þátttakandi í samtalinu, ekki aðeins taka á móti ákvörðunum, heldur fá kost á að leggja fram gögn, miðla upplýsingum og taka þátt í reglulegu samtali um stöðu og framtíð samgöngumála innan sveitarfélagsins.
Við munum áfram beita okkur fyrir reglulegu samráði við Vegagerðina, meðal annars með fundum, vettvangsheimsóknum og eftirfylgni með þeim verkefnum sem eru í undirbúningi eða framkvæmd. Markmiðið er skýrt: að tryggja að ástand vega í Flóahreppi styðji við umferðaröryggi, eðlilega uppbyggingu atvinnulífs og áframhaldandi góð skilyrði til búsetu í sveitarfélaginu. Á því kjörtímabili sem senn er að ljúka hafa fulltrúar í sveitarstjórn átt reglulegt samtal við Vegagerðina, þingmenn, ráðuneyti og aðra þá aðila sem fara með ábyrgð á fjárveitingu og framkvæmdir í vegakerfinu. Við höfum komið okkar sjónarmiðum á framfæri og komið með tillögur að forgangsröðum verkefna með það að markmiði að úrbótum á vegakerfinu verði sinnt jafnt og þétt í sveitarfélaginu.
Þó sveitarfélagið sjálft hafi mjög takmarkað formlegt vald yfir uppbyggingu og viðhaldi á stofn- tengi- og héraðsvegum, þar með talið heimreiðum, í sveitarfélaginu þá áttum við okkur á því að við höfum þá ábyrgð gagnvart íbúum að standa vörð um hagsmuni þeirra.
Framtíðarsýn okkar í samgöngumálum byggir á því að Flóahreppur verði hluti af sterku samgöngukerfi þar sem öryggi vegfarenda er í fyrirrúmi. Við eigum að þora að setja það markmið með Vegagerðinni og þingmönnum okkar kjördæmis að innan 5 ára séu allir stofn- og tengivegir í sveitarfélaginu komnir með klæðningu eða á áætlun hjá Vegagerðinni. Samhliða þarf að vera krafa um að viðhaldi á malarvegum innan sveitarfélagsins sé sinnt betur en víða eru dæmi um að ekki hafi verið borin möl í heimreiðar og lengri héraðsvegi í marga áratugi
Með sameiginlegu átaki sveitarfélagsins, Vegagerðarinnar og ríkisins getum við unnið saman að þessu markmiði.
Fulltrúar Framfaralistans eru tilbúnir að leggja sitt af mörkum – af festu, ábyrgð og í góðri samvinnu – því samgöngur eru slagæð samfélagsins og lykill að áframhaldandi lífsgæðum í Flóahreppi.
Hulda Kristjánsdóttir
Sveitarstjóri Flóahrepps
Skipar 2. sætið hjá Framfaralistanum í Flóahreppi