Saman erum við sterkari er frasi sem er til af ástæðu. Að vinna saman að verkefnum, tala saman í hópi, kasta á milli sín hugmyndum, deila kostnaði, húsnæði og vinnuframlagi er hagræði. Góð samvinna er öllum til hagsbóta.
Fyrir einhverjum árum síðan var ég að hugsa mér til hreyfings með handverkstengdu ferðaþjónustuna mína, jurtalitunarvinnustofuna Hespuhúsið. Ég var að leita að framtíðarstað þar sem ég væri nær ferðamönnunum en í Andakílnum. Ég hafði samband við Byggðastofnun vegna lánamála í ákveðnum landshluta og fulltrúinn sagði “Bara svo þú vitir það þá er engin samvinna hér. Hér vinna allir á móti öllum.” Þetta sló mig það illa að ég hætti að hugsa um þann landshluta. Mér þótti þetta skrýtið, komandi úr Borgarfirði þar sem samvinna í ferðaþjónustunni er mjög virk og góð.
Þegar Hespuhúsið var að íhuga flutning á Suðurlandið fór ég í viðtal hjá Markaðsstofu Suðurlands á Selfossi sem Ölfus var þá hluti af. Ég átti gott spjall, fékk kaffi og hvatningu og úr varð að ég flutti í Ölfusið með mitt fyrirtæki. Síðan þá hefur Markaðsstofa Suðurlands reynst mér vel á ýmsum sviðum í mínu starfi í ferðaþjónustu.
Það eru öflug ferðaþjónustufyrirtæki í Ölfusi og enn fleiri tækifæri að opnast með fleiri gistimöguleikum í sveitarfélaginu. Hér er rekin fjölbreytt ferðaþjónusta sem tengist menningu og handverki, hestamennsku, fræðslu um orkuna, hellaskoðun, ævintýrum á buggy bílum og ýmis konar veitingaþjónusta, svo eitthvað sé nefnt. Einnig eru fjölmörg tækifæri þegar kemur að náttúrustöðum með fjörur, hraun, fjalllendi, gönguleiðir, jarðhita, vötn og sjóinn.
Til að sækja enn frekar í þessi tækifæri telur Samfylkingin og félagar að Sveitarfélagið Ölfus eigi að sækjast aftur eftir samstarfi við Markaðsstofu Suðurlands til að nýta þann sameiginlega slagkraft sem slíkt samstarfsverkefni felur í sér. Ölfus hætti í því samstarfi árið 2023 og er í dag eina sveitarfélagið á landinu sem ekki er í samstarfi við markaðsstofu síns landshluta.
Samvinna og samtal eru lykilorð okkar og höfum við hug á að endurvekja eða efla samtöl og samvinnu við íbúa, fyrirtæki, nágrannasveitarfélög og aðra hagaðila sem við sjáum tækifæri í að vinna með, því saman erum við sterkari.
Guðrún Bjarnadóttir
10. sæti á lista Samfylkingarinnar og félaga í Ölfusi