Hveragerði er einstakur bær. Hér sameinast fallegt bæjarstæði, nánd við fjölbreytta náttúru og samfélag þar sem fólk þekkist og stendur saman þegar á reynir.
Ég flutti í Hveragerði árið 1991, þá sex ára gömul. Ég hef alla tíð litið á það sem forréttindi að hafa alist upp í Hveragerði, svo þegar kom að því fyrir okkur hjónin að ákveða hvar við vildum setjast að og ala upp börnin okkar var valið auðvelt.
Enginn annar staður kom til greina.
Umhverfið í Hveragerði er einstakt og hér eru fjölmörg tækifæri til að efla lýðheilsu. Sundlaugin, golfvöllurinn og fjölbreyttir útivistarmöguleikar gera daglegt líf bæði heilbrigt og ánægjulegt. Þetta eru allt þættir sem styrkja samfélagið og gera Hveragerði að líflegum og góðum stað fyrir fólk á öllum aldri.
Rekstur sem varð að samfélagi
Fljótlega eftir að við fluttum aftur til Hveragerðis og stofnuðum hér fjölskyldu opnuðum við hjónin CrossFit Hengil. Reksturinn varð fljótt stór hluti af lífi okkar og á rúmum áratug byggðum við upp starf sem tengdi saman fólk úr ólíkum áttum.
Árin okkar í CrossFit Hengli voru mér sérstaklega lærdómsrík. Markmiðið okkar var að tíminn sem fólk varði hjá okkur væri hápunktur dagsins. Við lögðum áherslu á virðingu, persónulega nálgun og hvetjandi samfélag þar sem allir gátu fundið sinn styrk.
Leiðarljós okkar var einfalt: „Enginn getur allt en allir geta eitthvað.“ Það var ekki bara slagorð heldur hugsun sem mótaði menninguna, samskiptin og andrúmsloftið í kringum starfið og hefur fylgt mér áfram.
Í dag starfa ég sem ráðgjafi hjá Vinnumálastofnun. Þar, eins og í öðrum verkefnum, skipta mannleg nálgun, hlýja og skýr samskipti sköpum. Fagmennska og virðing fyrir fólki eru lykilforsendur árangursríks samstarfs.
Sterkt samfélag til framtíðar
Ég trúi því að samheldni, gagnsæi og góð samskipti séu hornsteinar hvers samfélags. Þegar fólk vinnur saman og nýtir styrkleika hvers annars verður samfélagið sterkara.
Hveragerði stendur á sterkum grunni, en hann hefur óneitanlega veikst á síðustu árum. Hér er kraftur, samheldni og fólk sem vill vel. Framtíðin ræðst af því hvernig við stöndum saman, nýtum styrkleika sveitarfélagsins og byggjum áfram á þeim gildum sem lengi einkenndu bæinn okkar.
Þetta er samfélagið sem mótaði mig og hér hef ég valið að ala börnin mín upp. Mér er annt um bæinn, fólkið sem hér býr og hvernig við mótum framtíðina saman.
Saman getum við byggt enn sterkara samfélag fyrir alla.
María Rún Þorsteinsdóttir
Skipar 2. sæti D-lista Sjálfstæðiflokksins í Hveragerði