Mikil uppbygging hefur átt sér stað í Sveitarfélaginu Árborg á undanförnum árum. Þegar horft er til næstu ára vill D-listinn í Árborg gera átak í að dreifa álaginu sem fylgir íbúafjölgun á fleiri svæði utan Selfoss. Þá er spurning til hvaða svæða við getum litið í því sambandi. Árborg á t.d. land á Eyrarbakka og Stokkseyri sem getur nýst til að byggja upp fjölbreytt húsnæði fyrir aðila sem vilja flytja í sveitarfélagið.
Hverjar eru forsendur uppbyggingar?
Til þess að við ströndina þrífist áfram blómleg samfélög er nauðsynlegt að sveitarfélagið geri það sem í valdi þess stendur til að tryggja uppbyggingu bæði hvað varðar íbúða- og atvinnuhúsnæði. Til að stuðla að því er mikilvægt að við höldum áfram að deiliskipuleggja svæði undir íbúðabyggð og atvinnuhúsnæði.
Til að byggja upp byggðakjarna þarf að tryggja að innviðir taki við frekari íbúafjölgun. Á Eyrarbakka og Stokkseyri eru lagnir orðnar gamlar og kominn tími á endurnýjun. Það ferli er hafið með endurnýjun hluta Eyrarlagnar sem á eftir að auðvelda flutning á heitu vatni til Eyrarbakka og Stokkseyrar. Auk þess að endurnýja og byggja upp innviði er mikilvægt að til staðar séu hvatar til uppbyggingar. Sem dæmi vill D-listinn endurskoða gjaldskrár sem væri til þess fallið að stuðla að lækkun lóðaverðs á Eyrarbakka og Stokkseyri.
Til hvaða svæða er hægt að horfa?
Á Eyrarbakka hefur staðið að lengja Hjalladæl til vesturs sem er metnaðarfullt verkefni og myndi efla byggðina til muna. Stækkun á Hjalladæl til austurs er þegar komin í farveg og er áætlað að gatnagerð hefjist í maí. Þar er gert ráð fyrir einbýlis-, rað- og parhúsum sem styður fjölbreytta götumynd í þorpinu. Í vesturhluta Eyrarbakka er atvinnusvæði þar sem búið er að úthluta nýjum lóðum og unnið er að frekari úthlutunum. Það er mikilvægt öllum samfélögum að boðið sé upp á fjölbreytta starfsemi fyrirtækja.
Á Stokkseyri eru metnaðarfull verkefni við Tjarnarstíg og Dvergasteina sem verður hægt að bjóða til uppbyggingar á næstu mánuðum. Þar með er ekki allt upp talið því að í báðum byggðakjörnum eru möguleikar á spennandi sjávarlóðum með fallegu útsýni yfir hafið og ströndina, sem er ein af helstu náttúruperlum sveitarfélagsins.
Hvað ber framtíðin í skauti sér?
Samhliða íbúafjölgun er þörf á styrkingu innviða. Auk þeirra atriða sem hér hafa verið nefnd í því sambandi er ekki síður mikilvægt að styrkja innviði er snúa að skólahaldi. Þar ber helst að nefna framtíðarlausn á kennsluaðstöðu á Eyrarbakka. Með því verður það aðdráttarafl sem hvað mest áhrif hefur á barnafjölskyldur, þ.e. skólamál, jafnara innan sveitarfélagsins. Sterkari innviðir á ströndinni auka líkurnar á því að íbúafjölgun dreifist betur og samhliða því munu Eyrarbakki og Stokkseyri verða aðlaðandi fyrir fyrirtæki sem sjá fyrir sér framtíð í stækkandi samfélagi. Með aukinni uppbyggingu við ströndina eflum við sveitarfélagið sem heild.
Við erum á réttri leið – D-listinn í Árborg
Sigurbjörg Guðmundsdóttir og Gísli Rúnar Gíslason
7. og 9. sæti hjá D-listanum í Árborg