Laugardaginn 4. febrúar sl. fór fram minningarmót í knattspyrnu í íþróttahúsunum Iðu og Vallaskóla.
Um kvöldið slúttuðum við svo frábæru móti með mögnuðum dansleik í Hvíta Húsinu, svona ekta ,,Guðjóns Style´´. Mótið er firma- og hópakeppni og er haldið af knattspyrnudeild Selfoss til minningar um frábæran félaga og vin, Guðjón Ægi Sigurjónsson, sem lést af slysförum langt um aldur fram.
Alls tóku 24 fyrirtæki/hópar þátt í mótinu og langar okkur að þakka þeim kærlega fyrir þátttökuna og stuðninginn við knattspyrnudeild Selfoss.
Guðjónsdagurinn eins og við höfum ákveðið að kalla þennan viðburð er orðinn árlegur og fastur punktur í viðburðadagatalinu og fer fram fyrstu helgina í febrúar ár hvert. Er virkilega gaman að sjá hve fyrirtækin/hóparnir lögðu mikið í búninga og alla umgjörð sína, sem eykur á skemmtanagildið og gleðina í kringum daginn.
Okkur langar einnig að þakka öllum styrktaraðilum mótsins og fjölskyldu Guðjóns fyrir að gera þetta mögulegt en margir lögðu hönd á plóginn til að gera þennan dag sem eftirminnilegastan.
Sérstakar þakkir fá Þórdís Erla og fjölskylda, Snyrtistofan Myrra, Svava Svavarsdóttir og Torfi Ragnar Sigurðsson fyrir alla hjálpina við undirbúninginn, Guðjón Emilsson í Íþróttahúsinu Iðu, Bergur Sigurjónsson Íþróttahúsinu Vallaskóla, Björgvin Magnússon hjá Vífilfell, Erna Dís hjá Mekka Wine and Spirits, Einar Björnsson og Hvítahúsið, Njörður Steinarsson, Adólf I. Bragason, Karl Þór Þorvaldsson, Leifur Viðarsson, Herbert Viðarsson, Gunnar Ólason, Jóhann Bachmann og Björn Daði Björnsson fyrir frábæra spilamennsku á ballinu. Ingunn Guðmundsdóttir í Pylsuvagninum, Vigdís Rós Gissurardóttir fyrir myndatöku á mótinu, Már Másson fyrir rödd mótsins og meistaraflokkar Selfoss karla og kvenna fyrir þeirra framlag í mótinu.
Guðjónsdagurinn er svo sannarlega kominn til að vera og er undirbúningur fyrir næsta ár þegar hafinn, og verður Guðjónsdagurinn haldinn þann 2. febrúar 2013 . Sjáumst þá.
En þangað til, bestu kveðjur og þúsund þakkir til allra.
Sævar Þór Gíslason, mótsstjóri.