N-listinn vill byggja upp öflugt og samheldið samfélag í Rangárþingi eystra þar sem íbúar njóta góðrar þjónustu og fjölbreyttra tækifæra. Sveitarfélagið hefur tekið miklum breytingum á síðustu árum, íbúum hefur fjölgað, atvinnulíf styrkst og samfélagið orðið fjölbreyttara. Þessi þróun skapar bæði tækifæri og ábyrgð – ábyrgð til að byggja upp samfélag sem stendur sterkt til framtíðar.
N-listinn leggur áherslu á að sveitarfélagið verði áfram staður þar sem gott er að búa, starfa, alast upp og eldast. Hluti af því er að styðja við menningu, íþróttir og öflugt æskulýðsstarf. Fjölbreytt og samheldið samfélag er grunnurinn af góðu sveitarfélagi.
Við viljum leggja sérstaka áherslu á uppbyggingu íþrótta- og heilsuræktaraðstöðu í sveitarfélaginu. N-listinn vill skapa nútímalega og aðgengilega aðstöðu sem þjónar bæði börnum, ungmennum, fjölskyldum og eldri íbúum. Markmiðið er að efla heilsu og vellíðan íbúa, styðja við öflugt íþróttastarf og skapa vettvang fyrir hreyfingu, samveru allt árið um kring. Með markvissri uppbyggingu vill N-listinn tryggja að íbúar hafi aðgang að góðri aðstöðu til hreyfingar og heilsueflingar óháð aldri eða búsetu innan sveitarfélagsins. Með því að skapa þessi tækifæri eflum við lýðheilsu.
Nú eru tækifæri til að hefja uppbyggingu á nýrri og stærri heilsurækt, endurbyggja sundlaugarsvæðið og skapa betri aðstöðu til frjálsíþrótta- og knattspyrnuiðkunar svo eitthvað sé nefnt. Sveitarfélagið þarf líka að huga að leiksvæðum í sveitarfélaginu jafnt í dreifbýli sem og í þéttbýli.
Við hjá N-listanum erum ekki bara tilbúin í samtalið heldur erum við tilbúin að hefjast handa og láta verkin tala um ókomna framtíð.
Tómas Birgir Magnússon
Oddviti N-listans í Rangárþingi eystra