Sveitarfélagið Árborg sinnir fjölbreyttri þjónustu við íbúa á öllum aldri. Á undanförnum árum hefur þjónusta við eldri íbúa aukist en um leið breyst í takti við breyttar þarfir.
Gott að eldast í Árborg
Sveitarfélagið Árborg og Heilbrigðisstofnun Suðurlands (HSU) hafa á undanförnum árum í góðu samstarfi, þróað og innleitt verkefnið „Gott að eldast“. Hugmyndafræðin á bak við „Gott að eldast“ er að bæta lífsgæði og tryggja örugga og samfellda þjónustu fyrir eldri íbúa samfélagsins óháð því hvort hún er veitt af sveitarfélaginu eða
heilbrigðisstofnuninni.
Sveitarfélagið Árborg og Heilbrigðisstofnun Suðurlands skrifuðu síðan undir formlegt samkomulag um samvinnu milli heimahjúkrunar og heimastuðnings í Árborg í maí 2025.
Þjónustuþörf aukist og fleiri fá stuðning
Sveitarfélögum á Íslandi ber að bjóða upp á þjónustu sem miðar að því að efla sjálfstæði einstaklinga og draga úr félagslegri einangrun. Sveitarfélagið Árborg hefur vaxið ört síðastliðin ár og í dag fá um 300 íbúar sveitarfélagsins stuðningsþjónustu. Félagsleg stuðningsþjónusta getur verið allt frá mánaðarlegum innlitum og upp í
daglega einstaklingsmiðaða þjónustu. Eftirspurn eftir stuðningsþjónustu hefur aukist í takt við vöxt sveitarfélagsins og hafa verkefnin þrefaldast á síðast liðnum árum.
Þessi mikla fjölgun eftirspurnar um stuðningsþjónustu hefur kallað á skýra forgangsröðun verkefna og breytt vinnulag. Með öflugu starfsfólki og góðu samstarfi við aðra aðila hefur sveitarfélagið getað aukið þjónustuna og áframhaldandi uppbygging er í gangi.
Félagsleg tengsl og samvera eru undirstaða velferðar
Hér í Árborg hefur byggst upp öflug og fjölbreytt þjónustu með áherslu á virkni einstaklinga, heimaendurhæfingu og félagslegan stuðning. Sveitarfélagið hefur boðið upp á heilsueflingu undir leiðsögn á Selfossi, Eyrarbakka og Stokkseyri, endurgjaldslaust fyrir 60 ára og eldri. Nýtt starf tengiráðgjafa var þróað til að stuðla að félagslegri virkni, draga úr félagslegri einangrun og auka samvinnu milli kerfa. Tengiráðgjafi hefur reynst gríðarlega vel og aukið þjónustu við eldri borgara í sveitarfélaginu. Einnig hefur sveitarfélagið stutt vel við almennt félagsstarf eldri borgara sem er með því öflugra á landinu.
Velferðartækni hefur einnig verið notuð og er í þróun. Með tækninni er unnt að auka öryggi og skilvirkni í þjónustu við íbúa sveitarfélagsins og er hún góð viðbót við einstaklingsmiðaða þjónustu. Velferðartækni kemur þó aldrei í staðinn fyrir samveru, innlit og samtöl við ráðgjafa og starfsfólk stuðningsþjónustunnar.
Markmið stuðningsþjónustu í Árborg er alltaf að fólk getu viðhaldið færni sinni og að einstaklingar geti búið sem lengst á eigin heimili, í sínu umhverfi og nálægt sínu fólki. Leggjum áherslu á að halda áfram að þróa þjónustu við íbúa og má nefna að nú er í undirbúningi nýtt úrræði sem leggur áherslu á stuðning við aðstandendur fólks með heilabilun svo hægt sé að létta álag og bæta lífsgæði þjónustuþega og aðstandanda hans.
D-listinn í Árborg leggur áherslu á að öflug þjónusta við eldri borgara þróist áfram enda ein af undirstöðum heilbrigðs og sjálfbærs samfélags í Árborg okkar allra – þar sem þú skiptir máli.
Brynhildur Jónsdóttir
Bæjarfulltrúi og formaður fræðslu- og frístundanefndar
Þórhildur Dröfn Ingvadóttir
Varabæjarfulltrúi og formaður öldungaráðs