Í nýsamþykktri húsnæðisáætlun Árborgar eru metnaðarlaus áform núverandi meirihluta sjálfstæðismanna fyrir uppbyggingu á Eyrarbakka og Stokkseyri sett fram með formlegum hætti.
Á komandi árum vill meirihluti Sjálfstæðismanna gulltryggja að ekki verði lagt í uppbyggingu strandarinnar einhverra hluta vegna. Fáar lóðir eru á teikniborðinu sem glögglega kemur fram í töflu hér að neðan.
Ljóst er að hér er um algjört metnaðarleysi í deiliskipulagi og er óvíst að lóðirnar í húsnæðisáætlun verði úthlutað ef núverandi meirihluti myndi fá endurnýjað umboð. Þannig er nær gulltryggt að stærri verktakar kjósi að snúa sér að öðrum svæðum sem byggja má upp með hagkvæmari hætti. Stærri verktakar kjósa að byggja upp hvar nýta má starfsmenn og tæki til lengri tíma án tilfærslu. Taka ber fram að undirritaður kaus einn á móti tillögunni um að samþykkja framsetta húsnæðisáætlun vegna metnaðarleysisins á Eyrarbakka og Stokkseyri.
Tillaga um niðurfellingu á byggingarréttargjaldi á Ströndinni
Á bæjarráðsfundi á kjörtímabilinu lagði undirritaður fram tillögu um að fella niður byggingarréttargjald á Eyrarbakka og á Stokkseyri. Var tillagan sett í umræður og náði ekki framgangi. Var það mjög miður því núverandi Byggingarréttargjald leggst ofan á byggingarkostnað. Markaðsverð fasteigna á ströndinni er lægra en á Selfossi og ber því ekki Byggingarréttargjald á nýbyggingum. Segja má að Byggingarréttargjaldið hamli með öllu áhuga á því að byggja á Eyrarbakka og á Stokkseyri og einblína byggingarverktakar á svæði hvar von er á framlegð. Með þessum hætti hamlar núverandi meirihluti uppbyggingu með skattlagningu.
Framsókn vill sækja fram á Stokkseyri og á Eyrarbakka
Við skoðun svæðisins þá kemur glögglega í ljós að sveitarfélagið hefur verulegt svæði til umráða við þorpin til uppbyggingar. Sjávarlóðir sem eru ófáanlegtar í nágrannasveitarfélögum eru til reiðu niðuri á strönd. Einungis þarf viljann til að skipuleggja og bjóða áhugasömum. Væri því lag að bjóða áhugasömum að byggja einbýlishús á einstökum stað innan sveitarfélagsins. Slík uppbygging myndi styðja við þjónustuna í þorpunum og er endamarkmiðið að bjóða uppá einsetna skóla í hvoru þorpi fyrir sig þannig að börnin geti gengið í skólann eins og er í boði í öllum öðrum barnaskólum sveitarfélagsins. Með þessum hætti myndi byggð þéttast og hlutfall sumarhúsa lækka hvar eigendur greiða ekki útsvar til sveitarfélagsins.
Hagkerfi Strandarinnar tengist við Þorlákshöfn
Á mynd má sjá að á aðalskipulagi hefur verið gert ráð fyrir iðnaðarhverfi á mýrinni norðan 
við Eyrarbakka. Leggja þarf áherslu á að deiliskipuleggja þetta svæði og virkja. Með aukinni starfsemi myndi ströndin tengjast betur við atvinnustarfsemi á Selfossi og í Þorlákshöfn. Þannig myndi fjölgun starfa á ströndinni styðja við íbúðauppbyggingu á svæðinu ásamt því að uppbygging fangelsisins að Stóra Hrauni sem kemur fram á mynd spila lykilhlutverk í atvinnuuppbygginu. Nú þegar hefur sveitarfélagið Árborg tekið ákvörðun um að svera upp hitaveitulögn sem liggur frá Selfossveitum niður á strönd vegna óska frá ríkinu tengt uppbyggingu fangelsisins.
Á komandi árum er Sveitarfélagið Árborg með opið færi á línu til að stuðla að uppbyggingu atvinnulífs og íbúðabyggða á ströndinni. Kominn er tími til að huga að því að kjósa víðsýnt fólk til forystu í sveitarfélaginu í stað þeirra sem setja tröppur Ráðhússins (a.m.k. kr. -50.000.000) framar arðbærum fjárfestingum á ströndinni.
Arnar Freyr Ólafsson
Bæjarfulltrúi Framsóknar í Árborg