Eftirspurn eftir námi við Menntaskólann að Laugarvatni hefur sjaldan verið meiri og það er bæði ánægjulegt og krefjandi. Umsóknir til skólans hafa aukist verulega og skólinn þarf að vísa frá umsækjendum sem alla jafna hefðu innritast í skólann. Stórir árgangar nemenda sækja nú framhaldsskólana og ánægjulegt hefði verið að geta tekið á móti fleiri nemendum við ML.
Aðsókn að ML undirstrikar mikilvægi skólans í íslensku menntakerfi, ekki síst fyrir nemendur dreifðra byggða. Menntaskólinn að Laugarvatni hefur um áratugaskeið gegnt lykilhlutverki í að tryggja aðgengi að framhaldsskólanámi fyrir nemendur víðs vegar að af landinu en helsta þjónustusvæði skólans er Suðurlandið.
Heimavistin – hjarta skólastarfsins
Öflug og rótgróin heimavist er eitt af sérkennum Menntaskólans að Laugarvatni. Skólinn hefur sérhæft sig í rekstri heimavistar og þróað starfsemi sem byggir á sterkum grunngildum: heimilisbrag, kærleika og aga. Heimavistin er ekki aðeins húsnæði heldur annað heimili nemenda og lykilþáttur í námsárangri og vellíðan þeirra.
Á heimavistinni búa flestir nemendur skólans og þar myndast samfélag og vinátta sem fyrir marga varir fyrir lífstíð. Nemendur lifa og læra saman í umhverfi þar sem lögð er áhersla á stuðning, samábyrgð og jákvæð samskipti. Starfsfólk heimavistarinnar gegnir mikilvægu uppeldis- og stuðningshlutverki og myndar traustan ramma utan um daglegt líf nemenda.
Lykill að jöfnu aðgengi
Góður heimavistarkostur er lykilforsenda þess að tryggja jafnt aðgengi að námi. Ísland er dreifbýlt land þar sem fjarlægðir geta verið miklar og án heimavistar hefðu margir nemendur ekki raunhæfan kost á að sækja sér nám við hæfi utan síns nærumhverfis.
Menntaskólinn að Laugarvatni er skýrt dæmi um hvernig heimavistarskóli getur stuðlað að raunverulegu jafnrétti til náms. Mikil aðsókn að skólanum sýnir að þörfin fyrir heimavistarþjónustu fer vaxandi í landi þar sem við viljum að dreifðar byggðir njóti öflugs stuðnings og faglegrar þjónustu. Núverandi húsnæði setur þó skýrar skorður og því er uppbygging nýrrar heimavistar og viðbygging við skólann forsenda þess að hægt sé að mæta eftirspurn til framtíðar. Betur má ef duga skal í málefnum framhaldsskólanna; við köllum eftir uppbyggingu og stuðningi við ungmennin.
Jóna Katrín Onnoy
Skólameistari Menntaskólans að Laugarvatni