Sveitarfélagið Árborg hefur stækkað með ógnarhraða á undanförnum árum. Hér hafa byggst upp ný íbúðahverfi, auk verslunar og þjónustu, sem er vissulega fagnaðarefni. En meira þarf til svo samfélagið blómstri. Til að byggja upp raunveruleg lífsgæði, sterka sjálfsmynd og sanna samkennd þarf sál, og sálin býr í menningunni.
Þegar kreppir að í efnahagslífinu er rökrétt að sveitarfélög verji lögbundna grunnþjónustu. En nú, þegar við sjáum fram úr mestu erfiðleikunum, er kominn tími til að stíga stórt skref fram á við. Við megum ekki gleyma því að menning er ekki munaðarvara heldur arðbær langtímafjárfesting sem auðgar mannlífið og skapar dýrmæt tækifæri fyrir okkur öll.
Það er því dapurlegt að horfa upp á hvernig upphafleg, metnaðarfull sýn um glæsilegan menningarsal í nýja miðbænum hefur smám saman hjaðnað yfir í hugmyndir um „rislítið bíó“. Slíkt er í besta falli klór í bakkann, en engin raunveruleg framtíðarstefna. Gamla tuggan um að „klára tónleikasalinn við Hótel Selfoss“ heyrist oft í ræðum á tyllidögum, en hefur því miður reynst lítillát skrautfjöður fremur en merki um raunverulegan vilja til framkvæmda. Árborg á betra skilið.
Skammsýni í skipulagsmálum birtist einnig í húsnæðisvanda hins frábæra Tónlistarskóla Árnesinga. Sú hugmynd að púsla skólanum inn í einhverja viðbót við Stekkjaskóla – áform sem sprungu síðan á plássleysi – vekur eðlilega furðu.
Stofnun sem þjónar jafn stóru og ört stækkandi svæði þarf meira en afgangsrými. Tónlistarskólinn okkar á skilið að vera í öndvegi, sýnilegur og miðlægur, þar sem hann endurspeglar það mikilvægi sem við raunverulega leggjum á listir og menntun.
Hversu stórkostlegt væri ekki að fella hann beint inn í nýtt, iðandi menningarhús í hjarta bæjarins? Þar mætti einnig hýsa starfsemi Dansakademíunnar sem stendur frammi fyrir húsnæðisleysi.
Nýlega mættu um þúsund manns á glæsilega lokasýningu sem haldin var í Borgarleikhúsinu! Þvílík upplifun fyrir iðkendur sem án efa eiga mörg hver eftir að halda áfram að dansa sig inn í hjörtu fólks. Þetta starf er ómetanlegt fyrir sunnlenska menningu.
Mörg sveitarfélög, sum meira að segja talsvert minni en Árborg, hafa sýnt framsýni og reist glæsileg menningarhús með frábærum árangri. Staði þar sem tónlist, leiklist, ráðstefnur og listasýningar fléttast saman við fjölbreytt samfélagslíf allan ársins hring.
Við eigum ekki að láta okkur nægja lágmarkið þegar við höfum burði til að skapa eitthvað stórkostlegt. Tökum höndum saman, sýnum djörfung í ákvörðunum og byggjum upp öflugt menningarhús í miðbænum. Með því aukum við aðdráttarafl Árborgar, búum til einstaka menningarlega sérstöðu og gefum samfélaginu okkar hjartað sem það þarfnast til að blómstra um ókomin ár. Framtíðin er björt – ef við þorum að grípa hana.
Birgir Marteinsson
Skipar 4. sæti á lista Viðreisnar í Árborg
Sandra Guðmundsdóttir
Skipar 7. sæti á lista Viðreisnar í Árborg