Á kjörtímabilinu sem nú er að ljúka hefur verið unnið markvisst að því að bæta stöðu barnafjölskyldna í Hveragerði. Þar ber hæst að frá febrúar 2026 eru sex tímar á dag gjaldfrjálsir í leikskólum bæjarins. Það jafngildir um 70% lækkun leikskólagjalda fyrir átta tíma vistun frá síðasta kjörtímabili.
Staðan 2018-2022
Árið 2017 setti Hveragerðisbær sér það metnaðarfulla markmið að tryggja börnum frá 12 mánaða aldri leikskólapláss. Við opnun nýs húsnæðis fyrir Leikskólann Undraland sama ár náðist að uppfylla það markmið og næstu misseri á eftir. Á síðasta kjörtímabili, 2018-2022, var hins vegar ekki hugað nægilega vel að áframhaldandi uppbyggingu í leikskólum bæjarins í takt við íbúafjölgun, biðlistar urðu til og börn frá 12 mánaða aldri komust ekki inn á leikskóla.
Nýtt uppbyggingartímabil
Á því kjörtímabili sem nú er að ljúka ákvað núverandi meirihluta að ráðast í að stækka Leikskólann Óskaland og opnaði nýr hluti hans vorið 2025. Með þeirri framkvæmd hefur náðst að útrýma biðlistum eftir leikskólaplássi sem hafði verið viðvarandi frá síðasta kjörtímabili. Öllum börnum frá 12 mánaða aldri hefur því verið tryggt leikskólapláss í Hveragerði, auk þess að leikskólagjöld hafa lækkað um 70% eins og áður segir. Það er mikil þjónustuaukning fyrir leikskólabörn og barnafólk í Hveragerði. Auk þess var starfsmannaaðstaða bætt til muna í Óskalandi.
Næstu skref
Uppbygging heldur áfram. Á þessu ári fer af stað hönnun nýs leikskóla í Kambalandi og framkvæmdir hefjast á næsta ári. Gert er ráð fyrir að starfsemi hefjist seint á árinu 2027 eða snemma árs 2028. Með þessum aðgerðum hefur núverandi meirihluti ekki aðeins leyst vanda sem skapaðist á síðasta kjörtímabili og erfðist yfir á það kjörtímabil sem nú er að ljúka, heldur einnig lagt grunn að uppbyggingu í takt við áframhaldandi fjölgun íbúa.
Njörður Sigurðsson
Bæjarfulltrúi Okkar Hveragerðis