Nú er félagið 25 ára á þessu ári og á þeim tíma hefur aldrei verið kosið á milli lista í formannskjöri, þar sem aldrei hefur borist mótframboð gegn A-lista uppstillingarnefndar. Ef ekkert mótframboð kemur fram er sitjandi formaður sjálfkjörinn.
Að leggja í þá vegferð að bjóða sig fram gegn formanni og A-lista er langt í frá að vera auðvelt. Það sem þarf að leggja fram eru að lágmarki 75 undirskriftir meðmælenda, fjóra aðalmenn í stjórn og tvo varamenn. Þar að auki þarf að skipa í fimm nefndir sjóða, sem saman telja þrettán nöfn.
Ó nei, það er ekki allt búið enn, því einnig þarf viðkomandi frambjóðandi að skipa í stjórnir þriggja sjóða, sem eru þrettán nöfn, tilnefna þrjá skoðunarmenn reikninga og þar að auki í fulltrúaráð tveggja lífeyrissjóða, alls fimmtán nöfn. Samtals eru þetta því 15 á lista og að lágmarki 75 meðmælendur.
Sá listi sem leggur í slíka vegferð hlýtur að vilja vinna fyrir félagsmenn af heilindum í einu og öllu og í grunninn gera gott betra.
Þeir sem leggja í þessa vegferð hljóta jafnvel að vera dálítið galnir, því A-listi þarf til dæmis ekki að afla sér að lágmarki 75 meðmælenda.
Þetta framboð byggist á hugsjón og von um breytta tíma. Verkalýðsfélag á að vera fyrirmynd fyrir félagsmenn jafnt sem atvinnurekendur.
Ég undirrituð skilaði inn umbeðinni tillögu um breytt fyrirkomulag á starfi bókara félagsins í lok febrúar, ásamt rökstuðningi um aukið gagnsæi, ábyrgð og betri yfirsýn. Með því einu að færa allt daglegt bókhald frá endurskoðanda inn á skrifstofu félagsins yrði kostnaðarliður vegna bókhalds talsvert minni.
Ef starfsmenn og stjórnir hafa náð að snúa við fjárhag félagsins, þá er það ótrúlega vel gert og einstaklega aðdáunarvert, og einmitt til þess fallið að styrkja innviði félagsins.
Ég tel að birta eigi alla ársreikninga og fundargerðir opinberlega á heimasíðu félagsins svo félagsmenn geti verið upplýstir.
Ég vil einnig árétta að ég og B-listinn munum ávallt vinna fyrir félagsmenn en ekki atvinnurekendur. Það segir sig þó sjálft að samtal félagsins við atvinnurekendur um upplýsingagjöf er félögum til góðs. Vel upplýstir atvinnurekendur bjóða starfsmönnum sínum upp á góða og eftirsótta vinnustaði.
Við vitum að stjórn og starfsmenn, sem hafa unnið fyrir félagið, hafa gert það af heilindum. Ég er stolt af því að hafa unnið fyrir félagið, en veit og trúi því að ávallt megi gera gott betra.
Nú gefst félagsmönnum tækifæri til að nýta kosningarétt sinn og hafa áhrif á framtíð félagsins.
Nýtum kosningaréttinn og kjósum B – listann.
Kæru félagsmenn og aðrir sem hafa skoðanir á þessum málum, ég bið ykkur einlæglega um að hafa í huga að aðgát skal höfð í nærveru sálar. Förum í málefnin, en ekki manninn.
Af heilindum, ábyrgð og trú á sterkara félag.
Bergþóra Haralds Eiðsdóttir
Fyrir hönd B-lista framboðs til stjórnar VLFS