Takk fyrir að taka á móti börnunum mínum á morgnanna, fræða þau, fæða þau og gera að betri manneskjum.
Takk fyrir að tryggja sorphirðu, götuþrif, snjómokstur og aðra þjónustu þannig að ég kemst til og frá heimili mínu í verstu veðrum.
Takk fyrir að tryggja heita vatnið heim til mín þrátt fyrir allar þær áskoranir sem fylgja ofurvexti.
Takk fyrir að láta íþróttastarf ganga upp þrátt fyrir endalausa óvissu í málum íþróttamannvirkja.
Takk fyrir að styðja við félagsstarf hina ýmsu aðila.
Takk fyrir að halda gámasvæðinu í svona góðu standi með bros á vör.
Takk fyrir að sinna umhverfinu og þeim útivistarsvæðum sem eru til þrátt fyrir stíft aðhald.
Takk fyrir að starfa undir erfiðum fjárhag með lausnamiðaðri hugsun í öllum ykkar störfum.
Takk fyrir að gera sveitarfélagið að áhugaverðum stað fyrir fjölskyldur og einstaklinga til að vera og búa þrátt fyrir allar þær áskoranir sem þarf að ráðast á.
Líkt og í fyrirtækjarekstri er ekkert fyrirtæki sterkara en það starfsfólk sem þar starfar.
Stjórnin hefur vissulega mikil áhrif á stefnu og markmið, en það er starfsfólksins að láta dæmið ganga upp. Það vill því miður of oft verða þannig að umræðan í samfélaginu beinist gegn starfsfólki sveitarfélagsins sem vinnur vinnuna sína af heilindum. Það gleymist alltof oft að hrósa þessu frábæra fólki þegar vel gengur og stjórnin ber sig á brjóstið.
Takk fyrir mig.
Daníel Leó Ólason
8. sæti á lista Viðreisnar í Árborg