Viðsnúningur í rekstri Hveragerðisbæjar á kjörtímabilinu
Ársreikningur Hveragerðisbæjar fyrir árið 2025, sem var tekinn til fyrri umræðu á bæjarstjórnarfundi í gær 9. apríl, sýnir jákvæða og trausta niðurstöðu og hefur orðið verulegur viðsnúningur í rekstri bæjarins á þessu kjörtímabili sem er að ljúka.
Nýir tímar og stöðugur rekstur
Á kjörtímabilinu hefur rekstur bæjarins tekið markvissum viðsnúningi. Árið 2023 var reksturinn kominn í jafnvægi eftir að hafa batnað frá árinu 2022. Árið 2024 skilaði reksturinn 169 m.kr. hagnaði og árið 2025 93 m.kr. afgangi.
Kjörtímabilið 2018-2022 skilaði tapi
Á síðasta kjörtímabili, 2018–2022, skilaði aðeins eitt ár hagnaði, fyrsta árið. Frá árinu 2019 var reksturinn stöðugt í tapi. Þegar nýr meirihluti Okkar Hveragerðis og Framsóknar tók við að loknum kosningum í lok maí 2022 var uppsafnað tap síðustu þriggja ára orðið 516 m.kr. í A- og B-hluta sveitarfélagsins. Þar af var tap ársins 2021 um 366 m.kr., sem var síðasta heila rekstrarár fyrrum meirihluta Sjálfstæðisflokksins.
Sterkur grunnur til áframhaldandi uppbyggingar
Staðan var því skýr um verkefni nýs meirihluta, nauðsynlegt var að snúa rekstrinum við á sama tíma og mikil uppbyggingarþörf var til staðar í bænum, m.a. í skólamannvirkjum, íþróttaaðstöðu og fráveitu, auk þess að bæta þjónustu við íbúa.
Reksturinn stendur nú á traustum grunni, samhliða umfangsmikilli uppbyggingu innviða. Þetta er árangur markvissrar og ábyrgrar fjármálastjórnar og leggur sterkan grunn að áframhaldandi uppbyggingu í Hveragerði.
Dagný Sif Sigurbjörnsdóttir, bæjarfulltrúi Okkar Hveragerðis
Jóhanna Ýr Jóhannsdóttir, formaður bæjarráðs og bæjarfulltrúi Framsóknar
Halldór Benjamín Hreinsson, bæjarfulltrúi Framsóknar
Njörður Sigurðsson, bæjarfulltrúi Okkar Hveragerðis
Sandra Sigurðardóttir, forseti bæjarstjórnar og bæjarfulltrúi Okkar Hveragerðis