Árborg hefur á undanförnum árum byggt upp öflugt og metnaðarfullt íþróttastarf sem vekur athygli. Það er einn af helstu styrkleikum sveitarfélagsins og hefur mikla þýðingu fyrir börn, fjölskyldur og samfélagið í heild. Okkar áskorun nú er að viðhalda þessari uppbyggingu og halda í þennan styrkleika þrátt fyrir öran vöxt.
Hugmyndin um miðlægt íþróttasvæði hefur verið mikið rædd og hefur frá mínum bæjardyrum séð, ótal kosti. Með því að sameina aðstöðu og krafta á einum stað má skapa öflugan kjarna þar sem fjölbreytt íþrótta- og tómstundastarf fer fram. Slík lausn gæti styrkt bæði skóla-, íþrótta- og tómstundastarf til framtíðar.
Hagræðing í rekstri og uppbyggingu
Ljóst er að miðlægt svæði getur lækkað rekstrarkostnað og einfaldað utanumhald. Í stað þess að dreifa fjármunum í margar smærri einingar skapast tækifæri til að byggja upp öflugan og skilvirkan kjarna.
Nú eru áform um nýja íþróttaaðstöðu, sem allir eru sammála um að mikil þörf er á. Gert er ráð fyrir að nýtt íþróttahús rísi við Stekkjarskóla. Á sama tíma blasir við að byggja þarf nýjan grunnskóla innan fárra ára. Í því ljósi er eðlilegt að spyrja hvort annað íþróttahús eigi að rísa þar líka? Væri ekki gáfulegt að horfa strax til stærri miðlægari lausnar sem nýtist breiðari hópi og er hagkvæmari í rekstri?
Akstur, skipulag og öryggi barna
Í vaxandi sveitarfélagi verður akstur barna og ungmenna óhjákvæmilegur. Mikilvægt er að hann sé bæði öruggur og skilvirkur. Í dag fer veruleg vinna í að tryggja að börn komist á réttum tíma á æfingar og aftur til baka. Þetta er flókið og tímafrekt kerfi fyrir bæði starfsfólk og foreldra.
Miðlægt íþróttasvæði gæti einfaldað þetta verulega og dregið úr álagi. Enn fremur væri hægt að bæta þjónustuna með frístundamóttöku á svæðinu sem tæki á móti börnum, aðstoðaði þau við að komast á réttar æfingar og byði upp á öruggt umhverfi þar til foreldrar sækja þau. Samhliða mætti efla afþreyingu fyrir ungmenni á svæðinu og efla þar með forvarnarstarf.
Skipulag íþróttastarfs
Íþróttafélögin eru lykilaðilar í þessari vegferð og bera ábyrgð á að slíkt fyrirkomulag gangi upp. Nauðsynlegt er að stór auka samstarf og samræma plön, bæði innan félaga, á milli þeirra og vinna enn nánar með skólunum.
Aukið samstarf, einfaldari gjaldskrá og meiri sveigjanleiki milli greina gæti gert fleiri börnum kleift að prófa sig áfram og finna sína hillu, óháð búsetu eða efnahag.
Aukin þátttaka í íþróttum skilar sér á margan hátt. Ekki aðeins í betri líkamlegri heilsu heldur einnig í sterkari félagslegri tengingu og jákvæðari samfélagsþróun. Íþróttir eru vettvangur uppeldis, sjálfstrausts og samheldni. Rannsóknir hafa löngum sýnt að þátttaka barna í íþróttum hefur forvarnargildi gagnvart vímuefnanotkun og betri andlegri líðan, auk félagslegs þroska og lýðheilsu.
Ég vil því spyrja, höfum við sem samfélag kjark til að horfa til framtíðar og taka stefnumarkandi ákvarðanir sem bæði spara fjármuni til lengri tíma og styrkja samfélagið? Eða ætlum við að halda áfram að elta vöxtinn í stað þess að stýra honum?
Guðný Björk Pálmadóttir
2. sæti Viðreisnar í Árborgar