Grímsnes- og Grafningshreppur er eitt af þeim sveitarfélögum sem hefur framleitt hvað mesta orku í gegnum tíðina, eða allt frá því vatnsafls- og jarðvarmavirkjun hófst á Íslandi.
Sogsstöðvarnar voru byggðar upp til þess að sjá Reykvíkingum fyrir nægilegu rafmagni um miðja síðustu öld, og í lok aldar var jarðvarmi virkjaður á Nesjavöllum til þess að framleiða rafmagn og veita heitu vatni á höfuðborgarsvæðið. Þaðan er flutt gríðarlegt magn af heitu vatni á hverjum degi til að hita upp hús á höfuðborgarsvæðinu. Auðvitað erum við stolt af því að standa undir þessu öllu saman.
Á sama tíma er ótrúlegt að ekki sé búið að tryggja heitt vatn í hús í Grafningnum þrátt fyrir að þar sé staðsett ein stærsta jarðvarmavirkjun Íslands á Nesjavöllum. A-listinn vill vinna að því að nýting auðlinda í hreppnum verði ávallt með hagsmuni sveitarfélagsins að leiðarljósi og nýtist samfélaginu til framtíðar. Við munum vinna orku- og auðlindastefnu sem mun meðal annars taka á þessum málum. Það á að vera forgangsmál að orkan sem er framleidd í sveitarfélaginu nýtist þar að minnsta kosti að einhverjum hluta.
A-listinn vill jafnframt stuðla að öflugri innviðauppbyggingu í sveitarfélaginu þannig að atvinnustarfsemi eigi þess kost að byggjast upp á svæðinu. Til að hægt sé að laða að fyrirtæki þurfa innviðir að vera í lagi. Það verður að byrja á því að tryggja að forsendur séu fyrir hendi þannig að fyrirtæki sjái fyrir sér að staðsetja sína uppbyggingu í sveitarfélaginu. Þarna kemur margt til. Samgöngur, fjarskipti, lóðir fyrir iðnað og íbúa, raforka, heitt og kalt vatn svo eitthvað sé nefnt. Með því að tryggja að þessir innviðir séu til staðar verður auðveldara að styðja við frekari atvinnustarfsemi og uppbyggingu.
Þegar kemur að uppbyggingu fyrirtækja skiptir líka máli að starfsfólk þeirra hafi góðan aðgang að þeirri þjónustu og þeim lífsgæðum sem skipta máli í dag. Þar skiptir skólinn, leikskólinn og félagslífið miklu máli. Ekki síður en verslun og önnur þjónusta sem þarf að byggjast upp á svæðinu. Öll þessi atriði eru hluti af þeim innviðum sem fólk og fyrirtæki horfa til þegar þau ákveða hvar þau vilja vera til framtíðar.
A-listinn ætlar að standa fyrir áframhaldandi öflugri uppbyggingu á innviðum og stuðla að auknu aðgengi að orku fyrir öfluga atvinnuuppbyggingu og góð búsetuskilyrði.
Ragnheiður Eggertsdóttir
Skipar 4. sætið A-listans í Grímsnes- og Grafningshreppi