Áskorun til frambjóðenda í Árborg, Hveragerði og Þorlákshöfn fyrir sveitarstjórnarkosningarnar 16. maí 2026.
Á Suðurlandi býr ört stækkandi hópur fólks með heilabilun sem þarf sífellt meiri stuðning.
Samhliða því aukast kröfur á þjónustukerfi og aðstandendur. Sem iðjuþjálfar sem störfum
daglega með þessum hópi sjáum við greinilega að þörfin fyrir samfellda og aðgengilega
þjónustu mun halda áfram að aukast á næstu árum.
Við viljum beina þessum skrifum sérstaklega til þeirra sem nú bjóða sig fram til
sveitarstjórna í Árborg, Hveragerði og Þorlákshöfn. Fram undan eru mikilvægar ákvarðanir
um hvernig samfélög okkar geta mætt þörfum fólks með heilabilun og fjölskyldna þeirra.
Í dag er ýmis þjónusta til staðar, svo sem heimahjúkrun og dagþjálfun. Margir hafa þó
upplifað að erfitt geti verið að fá yfirsýn yfir kerfið og vita hvert eigi að leita á mismunandi
stigum veikindanna. Því getur skipt miklu máli að efla samræmda þjónustu og gera aðgengi
skýrara.
Þegar einstaklingur greinist með heilabilun hefst oft krefjandi ferli fyrir alla fjölskylduna.
Aðstandendur gegna þar lykilhlutverki og leggja gjarnan á sig mikla umönnun og stuðning.
Reynsla okkar sýnir að margir þeirra hefðu gagn af aukinni fræðslu, ráðgjöf og stuðningi til
að geta tekist á við þetta hlutverk af öryggi og styrk.
Aðstandendur eru ein mikilvægasta stoðin í þjónustu við fólk með heilabilun. Því er
mikilvægt að samfélagið allt styðji betur við þeirra hlutverk og tryggi að stuðningur sé
aðgengilegur og samræmdur.
Við teljum mikilvægt að efla samstarf milli heilbrigðis- og félagsþjónustu svo þjónustan
verði samfellari og einstaklingar og fjölskyldur upplifi meira öryggi í samskiptum við kerfið.
Þar má meðal annars horfa til þess góða starfs sem þegar hefur verið byggt upp í Árborg og Hveragerði með innleiðingu verkefnisins Gott að eldast. Verkefnið gerir meðal annars ráð fyrir heilabilunarráðgjafa í hverju heilbrigðisumdæmi og felur í sér mikilvægt skref í átt að bættri samhæfingu þjónustunnar og auknum stuðningi við fólk með heilabilun og
aðstandendur þeirra. Mikilvægt er að halda áfram að þróa slíkt samstarf og tryggja að það
nýtist sem best þeim sem á þjónustunni þurfa að halda.
Hlutverk heilabilunarráðgjafa er meðal annars að veita einstaklingum og aðstandendum
fræðslu, ráðgjöf og stuðning frá fyrstu stigum veikinda, að aðstoða fólk við að rata um
þjónustukerfið og stuðla að betri samvinnu milli þeirra aðila sem koma að þjónustunni.
Slíkur stuðningur getur aukið öryggi fjölskyldna, auðveldað aðgengi að úrræðum og stuðlað
að því að fólk fái viðeigandi þjónustu á réttum tíma.
Við viljum því spyrja ykkur sem bjóðið ykkur fram.
- Hvernig sjáið þið fyrir ykkur að styrkja þjónustu við fólk með heilabilun á ykkar svæði?
- Hvernig viljið þið styðja betur við aðstandendur?
- Hvernig má efla enn frekar samstarf milli þjónustukerfa?
- Hvernig getum við tryggt snemmtækan stuðning og ráðgjöf fyrir fólk sem er að greinast með heilabilun?
Þetta eru mikilvægar spurningar sem snerta fjölskyldur í sveitarfélögum okkar nú þegar og
munu skipta enn meira máli á komandi árum.
Við stöndum á tímamótum þar sem fjöldi fólks með heilabilun mun aukast verulega. Því er
mikilvægt að þessi mál fái aukið vægi í stefnumótun sveitarfélaga og að horft sé til framtíðar með markvissum hætti.
Sem samfélag höfum við tækifæri til að byggja upp þjónustu sem styður betur við fólk með
heilabilun og fjölskyldur þeirra. Nú er rétti tíminn til að ræða þessi mál opinskátt og móta
skýra framtíðarsýn.
Við hvetjum frambjóðendur í Árborg, Hveragerði og Þorlákshöfn til að leggja áherslu á
málefni fólks með heilabilun og aðstandendur þeirra í komandi sveitarstjórnarkosningum.
Það er verkefni sem snertir okkur öll.
Fanney Björg Karlsdóttir
Guðrún Lilja Jóhannsdóttir
Höfundar eru iðjuþjálfar á Suðurlandi og hafa nýlokið diplómanámi í Ráðgjöf í málefnum fólks með heilabilun við Háskólann á Akureyri