Nú hafa hverfisráðin verið endurvakin eftir að þau voru lögð niður sem liður í sparnaðaraðgerðum sveitarfélagsins. Hverfisráðin eru þrjú talsins og starfa á Eyrarbakka, Stokkseyri og í Sandvíkurhreppi. Er það vel. Ráðin eru vettvangur íbúa, búin til af sveitarfélögum til þess að efla íbúalýðræði og tengsl við nærsamfélagið. Hlutverk þeirra er því að vera rödd íbúa og á borð þeirra koma ýmis mál sem snúa að skipulagsmálum og þjónustu í samfélaginu auk framkvæmda sem ráðast þarf í og hafa setið á hakanum. Í samþykkt fyrir hverfisráð Sveitarfélagsins Árborgar segir að hverfisráð skuli vera vettvangur fyrir íbúa viðkomandi hverfis til að vera virkir þátttakendur í allri stefnumörkun Sveitarfélagsins Árborgar innan viðkomandi hverfis.
Þannig geta þessi ráð, sé á þau hlustað, verið mikilvæg brú á milli íbúa og stjórnkerfis sveitarfélagsins.
En er það svo?
Í aðdraganda þess að hverfisráðin voru vakin upp frá dauðum átti sá sem hér skrifar samtal við nokkra þeirra nefndarmanna sem sátu í ráðunum áður en þau voru aflögð. Lá mér forvitni á að vita hvort þessir sömu aðilar hefðu ekki hug á að bjóða fram krafta sína á nýjan leik fyrst að nú ætti að blása nýju lífi í ráðin. Svörin sem ég fékk voru þó á einn veg: Aldeilis ekki!
Hvers vegna?
Á sjálfboðaliðana, (því ekki fengu þau greitt fyrir störf sín, tíma og metnað), var einfaldlega ekki hlustað. Upplifunin var að um sýndarlýðræði hafi verið að ræða og að ráðin sem þau gáfu hafi gufað upp áður en blekið náði að þorna á fundargerðinni. Þannig var reynsla þeirra að þeim hafi verið sýnd vanvirðing við störf sín, eldmóð og tíma. Þannig hræða sporin og afstaða þeirra því skiljanleg.
Hvað svo?
Hverfisráðin hafa verið endurvakin eins og hér hefur komið fram með nýju fólki sem brennur fyrir nærsamfélagi sínu. Þeim er mikið verk fyrir höndum. Fundargerðir síðustu hverfisráða gefa vísbendingu um hvað mætti leggja fram að nýju þar sem lítið virðist hafa þokast í mörgum þeirra mála sem þó voru einföld og ódýr úrlausnar. Þá hefur niðurskurðarhnífurinn ekki síst bitnað mjög á innviðum þorpanna við ströndina líkt og kemur fram í fundargerð félags eldri borgara á Eyrarbakka frá 29. september á síðasta ári þar sem fjöldi ábendinga um atriði sem betur mættu fara eru tiltekin – mörg hver afar auðveld úrlausnar fyrir metnaðarfullt sveitarfélag að kippa í liðinn.
Virðing
Viðreisn fagnar því að hverfisráðin séu nú tekin til starfa. Við ætlum að fylgja eftir málum sem okkur er treyst fyrir af hverfisráðunum þar til niðurstaða liggur fyrir um málalok þeirra innan stjórnkerfisins. Það skal vera á ábyrgð bæjarfulltrúans sem fundi hverfisráðsins situr að skila svari um leið og það liggur fyrir í stjórnsýslunni, hvort sem það er nei eða já. Það er lágmarkskurteisi.
Viðreisn stundar ekki sýndarlýðræði og ætlar að sjá til þess að borin sé virðing fyrir því starfi sem fram fer í hverfisráðum sveitarfélagsins. Því getum við í það minnsta lofað.
Birgir Marteinsson
Skipar 4. sæti á lista Viðreisnar í Árborg